有28萬股東嘅地鐵（066），噚日朝喺九龍灣國際展貿中心舉行股東特別大會，就兩鐵合併進行投票。兩鐵合併係城中大事，關乎香港700萬人嘅利益，各大電視台、電台同報章都唔敢掉以輕心，間間傳媒機構如臨大敵，現場大大話話有成一百幾十個華華嘅行家。
不過，地鐵似乎無諗好點樣處理成百名傳媒嘅採訪，股東會一完，就叫傳媒喺會場外面嘅大堂等，佢哋會安排主席錢果豐，同行政總裁周松崗出嚟講兩句。嗱，唔好以為咁快就點完票出嚟公佈結果噃，由於點票需時，兩位並唔係講投票結果，只係講吓股東會感受。
舞嚟舞去出出入入
高層講嘢，唔通唔聽咩，不過，地鐵方面唔知係咪驚記者朋友等咗成朝，等到呆咗，所以同大家做吓熱身運動，一時叫傳媒喺右邊等，一時叫傳媒移去左邊。大佬呀，大班電台大哥揸住部攝影機，又擔梯、又駁線，咪玩啦！
唔知係咪玩得多，驚記者朋友攰，地鐵方面又無端端叫傳媒入去會場，坐低慢慢講，喺呢個時候俾人玩到氹氹轉嘅老記再忍唔住，成百人即時鼓譟，大聲嗌唔好。見到咁嘅情況，錢果豐同周松崗仲唔拿拿聲埋位，不過講唔夠十分鐘佢哋即閃！兩鐵合併咁大單嘢，講真唔係時時有，華華今次好彩無俾人踩死或者撞親，但都希望地鐵方面下次安排好啲啦，其他大機構記住唔好學呀！