以前大陸同胞成日等黃金周長假期，出外玩餐飽，但今時唔同往日，多一日假就少一日炒股，所以噚日十一黃金周後首日開市，啲大陸散戶不知幾雀躍。帝鸞話：「上證綜合指數要突破5800點，唔係發夢！」佢仲做埋預測，話只要北京天陰或落雨，上證指數就有運行。
據佢分析：「根據呢兩個月嘅觀察，只要上海股市大升，北京天氣大多數都係陰天，所以好希望北京陰天，落埋雨就仲好。」心隨幡動撐佢：「央企仲有『輸送氧氣』嘅能力，家陣普遍市盈率都唔算太高，如果公司有注資概念，上升嘅想像空間仲大，所以高開5800係有可能。」
不過，牛英九就嫌唔夠，「升嗰300點邊有意思？要大貪啲，再升5倍，望就望3萬點！」bbb010笑問：「係咪受到香港股市大升刺激？」
雖然好多網友話佢大想頭，但帝鸞就話：「難度大先至顯出我哋嘅信心同決心。」又話：「殷切期望香港過江龍資金能順利抵達Ａ股，禮尚往來。」
噚日上證綜合指數上晝已破關創新高，最高曾見5729點，收市報5692點，升2.53%。至於噚日北京嘅天氣，華華上過天文台個網站睇，答案係──北京天晴。