虎父無犬子，上一代嘅基因遺傳畀下一代正常不過，但估唔到效力同一間球會都受到「上一代基因」影響！熱刺前鋒廸科爾畀狗仔隊拍到背住未婚妻偷食，以為係一念之差，點知前科原來成本電話簿咁厚，再諗起兩名前熱刺殺手舒寧咸同連尼加，3代熱刺射手都風流成性，不禁令求大俠懷疑「球會遺傳」確有其事！
廸科爾大打「雙箭頭」
廸科爾近兩季越踢越頹，早前被爆同18歲售貨員一撻即着，4小時嘅魚水之歡面不改容，狂熱程度叫人側目，惟其未婚妻夏洛蒂一直未有回應，認為愛郎情人節送嘅110萬港元鑽戒夠晒誠意，偷食只係壓力所致。殊不知情債越揭越有，之前同廸科爾有過一段4個月情緣嘅23歲靚女甘美倫，亦替夏洛蒂不值，勇敢現身大踢爆！
其實廸科爾對女人非常「專一」，事關佢外出搵食都會搵番同未婚妻成個餅印嘅女士，而甘美倫亦係金髮大眼、身材養眼，衣着偏好「清爽型」；甘美倫先大讚廸科爾：「我叫佢『馬騮』，我開始同我一齊係因為我身材咯，仲經常問我『30DD嘅美好身段係咪假嘢』……之後，佢梗係知道堅過999金啦！」
講講吓，甘美倫開始入戲肉：「佢好『孤寒』，只係送過隻CD同粒石要用放大鏡先睇到嘅戒指畀我，之後朋友話我知廸科爾身邊成日有個好似我嘅女仔，我就知我唔係唯一，所以決定一刀兩斷！」
連尼加老樹開花
廸科爾分身乏術，唔怪得之球場冇嚟神氣，但佢加埋前輩舒寧咸同前英國小姐丹妮莉嘅風流史、連尼加同28歲嘅丹莉爾一段忘年戀，相信可為今季鬱鬱寡歡嘅熱刺球迷帶嚟話題。連尼加早排同丹莉爾去奧地利維也納旅行梳乎，唔知連尼加會唔會真係娶伊人過門？