商台DJ阮小儀同Donald年前曾經被拍得撐枱腳兼拖手行街，所以傳出秘密拍拖，但冇幾耐佢兩個又分別同其他人傳緋聞，所以呢段緋聞就不了了之，但佢哋所屬嘅商台似乎覺得佢兩個襯到絕，於是撮合佢哋一齊主持新節目《AiShiTeRu》，日前佢哋喺九龍灣MegaBox嘅流動直播室開幕，兩個仲扮到好似新郎同新娘咁，有晒花仔花女，梁漢文同傅穎就做賓客嚟鬧新房。
乘機晒恩愛
Edmond帶埋相架做賀禮，話畀佢哋放結婚相，傅穎就送白糖糕，Donald見到啲禮物即刻話：「我都冇話結婚。」不過佢同小儀都準備咗本通勝送畀Edmond，等佢快啲擇日結婚，又送攬枕畀傅穎。後來四個人玩心理測驗，結果Donald同小儀唔係最夾，反而同Edmond最夾嘅，不過Edmond就話自己同女友Karen先係最夾，真係骨痹。
傅穎話覺得自己似花女多過賓客，佢細細個都已經好想做花女，即使見到小儀着婚紗，都唔恨嫁，傅穎話：「新娘係靚，但我都未係時候着。」
