《福布斯》噚日公布新嘅中國富豪榜，年僅26歲嘅碧桂園太子女楊惠妍成為中國首富之外，更取代了已故華懋主席龔如心，成為亞洲最有錢女人。
《福布斯》亞洲版噚日公布2007年中國富豪榜，碧桂園創辦人之一楊國強26歲女兒楊惠妍，登上中國首富嘅寶座。據福布斯統計，楊惠妍個人淨資產高達160億美元（即1248億港元），成為亞洲最富有女人。
楊惠妍係碧桂園董事，喺美國俄亥俄州立大學畢業，現時主要參與公司物流及採購項目工作。楊惠妍持有95.2億股碧桂園，約佔發行股數58%，按噚日碧桂園收市價13.04元計，身家1241億元。碧桂園今年4月喺香港上市，上市半年股價急升1.4倍。
佢成為亞洲最有錢女人，或多或少同今年大陸股票及房地產市場熱爆有關，除咗楊惠妍外，打入福布斯十大中國富豪包括世茂集團許榮茂、復星國際郭廣昌、富力集團張力，噚日喺香港上市嘅SOHO中國張欣等都是大陸地產商。
去年首富排第10
喺福布斯亞洲2007中國富豪榜上，上榜嘅40人身價均超過10億美元（78億港元），而舊年只有15人達到𠵱個水平。上榜富豪嘅凈資產總額從去年嘅380億美元（2964億港元）增加到1200億美元（9360億港元），增幅高達215%。
福布斯高級編輯、中國富豪榜制榜人范魯賢（RussellFlannery）話：「居民收入迅速增長，越來越多人從農村湧向城市。這些趨勢為中國的房地產開發商創造了極大的商機。」
去年首富黃光裕雖然個人財富從23億美元增長到36億美元，增幅達56%，但佢喺富豪榜上卻反而下降咗9個名次，跌落到第10位。舊年嘅女首富、玖龍紙業董事長張茵，個人財富從15億美元增長到34億美元，增幅達126%，但佢嘅排名大跌至第11位。
mailto:[email protected]
中國10大富豪
1.碧桂園楊惠妍
2.世茂集團許榮茂
3.復星國際郭廣昌
4.富力集團張力
5.蘇寧電器張近東
6.江西賽維LDK太陽能彭小峰
7.SOHO中國張欣
8.中國泛海控股集團盧志強
9.中信泰富榮智健
10.國美電器黃光裕
資料來源：《福布斯》
