喺網上壓倒李四叔，榮升香港股神嘅大劉劉鑾雄，早喺80年代已經同四叔交過手，話說86年大劉靜靜雞喺市場吸納咗大批中華煤氣（003），跟手提出收購，四叔為免煤氣落入大劉手，高價向大劉買返佢手上嘅股份，憑狙擊煤氣，大劉賺咗幾千萬銀。用同樣伎倆，大劉喺88年狙擊過米高嘉道理嘅大酒店（045），袋咗1.34億銀，可見「股壇狙擊手」唔係浪得虛名。
狙擊手少損手
不過，要講佢嘅威水史，應該由85年回購愛美高開始。大劉83年將愛美高上市，85年初趁高位以2.04元將股權悉售；之後細價股大跌，同年9月大劉以每股0.7元回購34%，賺咗3000萬美元。
86至88年，大劉進行大大小小狙擊收購，86年分別狙擊莊士集團旗下嘅能達科技同華人置業，前者賺650萬銀，後者成為今日大劉嘅旗艦。
不過，大劉近年冇再搞大型狙擊，反而同好多散戶一樣認購吓新股。睇番往績，佢抽新股眼光都唔錯，05年認購雨潤食品（1068）同06年上市的海油化學（3983），至今升近兩倍；但舊年認購嘅建滔積層板（1888）仲潛緊水。今年大劉認購咗恒鼎（1393）、復星（656），同埋今日上市嘅SOHO中國（410），前兩者就分別升咗七成同四成。