「上海姑爺」羅康瑞呢幾年主力喺內地開闢「新天地」，不過佢都冇放棄香港市場，所以經常都要中港兩地飛，佢話一年有三分之二時間喺內地，原因係瑞安喺內地嘅規模已經大過香港辦公室，上海姑爺梗係忙過喺香港。所以除咗香港，佢話喺上海都有屋企，吓？你終於認喺上海有頭家？
羅康瑞一向都同傳媒朋友好老友，所以見到華華兩眼放光，都知唔慌好嘢，所以即刻補番句：「我係話有兩個屋企，唔係話有兩個老婆，講清楚啲，費事你誤會啦。」收到！其實羅康瑞雖然外表斯文靚仔媾死女，但識得佢嘅都知佢係謙謙君子，唔會亂嚟。
喺大陸奔波咗咁多年，羅康瑞都唔止一次話自己好習慣大陸生活，咁華華好自然問佢，如果你退休，會揀香港、上海，定係邊個城市住呢呵？佢話：「未諗過退休喎！」不過佢都陪華華玩「假設」，「可能都會周圍去，睇吓各地嘅建築物。」好似內地新近落成，有如巨蛋嘅北京大劇院，羅康瑞話都有興趣參觀，又話08年會去北京睇奧運，但問佢想睇乜嘢項目就話未決定。