求大俠幾時都話，荷甲聯係一個強弱懸殊兼好好賭嘅聯賽，好似周日海倫芬主場對荷華高斯咁，「解凍」復出嘅巴西前鋒艾方素個人獨建7功破荷甲紀錄，最後大派9隻光蛋畀呢隊「膠地王」，20倍「主其他」波膽咪就係咁易開咋嘛！
艾方素同好多巴西仔一樣，有基本腳法、速度唔錯、同埋門嗰腳準。聽講季前艾方素已經跳晒草裙舞想轉歐洲大球會，不過最後海倫芬唔畀佢走，搞到季初被球會雪藏；隔咗個幾月，可能海倫芬見球隊開季成績麻麻，上場歐協盃已經派番艾方素上陣，但仍然作客敗予希爾星堡5個一皮，仲提早出埋局。
開賽20分鐘中三元
前晚返荷甲聯作賽，艾方素再度獲「解凍」，點知呢位巴西射手雖然雪過一排，但雙腳竟然冇變冰條。上半場20分鐘內佢已經連中三元，下半場又「大四喜」，直頭上晒身咁；加埋施邦梅開二度，最終大炒荷華高斯9:0，呢個紀錄咪反映到荷甲聯水準參差囉。
嚟緊又會到1月轉會市場重開之時，大家記住要昅實艾方素呢個名，除時成為歐洲球會嘅獵物。其實，艾方素都唔係冇料到㗎，佢曾經7次入選過巴西國家隊，今夏仲有份打過美洲國家盃㖭！仲有，艾方素上季喺海倫芬入咗成34球，原本有機會攞走歐洲金靴獎，可惜荷甲聯系數只計1.5，相比起意甲聯嘅2.0，最後總分先輸畀羅馬嘅托廸咋！
但係講開又講，艾方素雖然有質素，應該不愁喺歐洲一線尾、二線頭嘅球會落班；不過佢呢類巴西前鋒，數吓數吓真係多到不得了。好似薩拉戈薩嘅奧利華拉、西維爾嘅路爾斯法比安奴咁，簡直係同類，艾方素可唔可以發圍，1月自然有答案啦！