後日（10號）係梅艷芳44歲生忌，佢嘅歌迷以「芳心薈」名義，前日喺尖沙嘴搞咗個「香港的女兒」梅艷芳展覽會開幕禮同成長之路展覽會。現場擺咗九個阿梅嘅人形紙板，仲有心意區同點唱區，歌迷又親自作咗首《忘不了您》，做成CD，每張50蚊，收益會捐畀樂施會。班歌迷仲用咗兩個月去做一個3DMUI玻璃纖維像，外形參照阿梅02年演唱會其中一個造型，頭髮、服裝同化妝都係由歌迷親自整，成個活動使咗6位數字，都係由歌迷籌錢。
安仔：感覺返晒嚟
阿梅嘅徒弟許志安同生前好友黎小田都有出席開幕禮揭幕儀式，現場吸引近200人圍觀。問安仔見完阿梅個3D玻璃纖維像覺得點，佢話：「側邊睇好似，正面就麻麻哋。個像係一比一，行埋去個感覺返晒嚟，阿梅似喺身邊，佢嘅精神仲喺度。」問到安仔點解得佢一個徒弟出席，佢話：「咁佢哋忙，但佢哋個個都好有心。」喺華星年代擔任阿梅唱片監製嘅黎小田就話：「我大膽講句，嚟緊五至十年冇人可以取代阿梅，你聽吓𠵱家啲歌咪知。」台下歌迷聞言即拍手和應。
現場仲有張學友、郭富城、曾志偉錄咗短片喺展覽會上播放，其中郭富城大讚真正舞台王者屬於梅艷芳，志偉喺片段就話：「阿梅有句口頭禪叫『超，當佢死』，任何嘢去到佢度都難唔倒佢，佢嘅硬淨令我深深佩服。」
