超人李嘉誠旗下逾百間公司，除咗密密搵真銀，久唔久都會回饋社會，好似和記港口旗下歐洲貨櫃碼頭，早前就捐咗225萬歐元資助喺荷蘭鹿特丹進行GenerationR研究項目。雖然歐元滙價高，但225萬歐元都不過係2500萬港銀，仲要分3年畀，對身家逾千億嘅超人嚟講，濕濕碎啦！
GenerationR係乜傢伙？嗱，根據有關方面嘅資料，呢壇嘢係由伊芳拉茲馬斯醫療中心、鹿特丹大學、蘇菲亞兒童醫院同市政府衞生服務機構合作嘅流行病研究項目，研究對象係鹿特丹1萬個唔同種族嘅小朋友，觀察佢哋由媽媽肚入面，到青年期間各方面嘅變化，有助促進各地小朋友嘅健康同保健發展。
肥水不流別人田
華華有啲好奇，無啦啦一個貨櫃碼頭，點解會資助醫療研究項目呢？不過，諗番超人旗下仲有兩間上市嘅醫療公司，一間係倫敦創業板（AIM）上市嘅和記中藥，另一間係本港創業板上市嘅長江生科（8222），又唔可以完全話佢哋唔啦更嘅，可能超人諗，話唔定日後研究有成果，可以益到公司發展呢。