再生會獲蘋果日報慈善基金撥款1.5萬元，舉辦為期半年的「與痛共舞－－支援長期痛症計劃」，為經歷過「痛不欲生」的參加者提供多元化的紓緩痛症及分享活動，齊齊將痛症化敵為友，跨過疾病帶來的痛苦崎嶇路途。
再生會中心主任李鳳英表示，持續痛楚超過三個月即被界定為長期痛症，據02年一項本地調查報告指出，約有一成香港人口在接受調查前的12個月內曾患有超過三個月的痛症，最常見的嚴重痛症包括頭痛、關節痛、腰背痛、肌肉痛及神經痛。部份痛症人士會患上焦慮症、抑鬱症、失眠，嚴重者更有自殺傾向。部份痛症無法根治，故希望透過「與痛共舞－－支援長期痛症計劃」，讓參加者學習與痛相處，適應痛症所帶來的影響，從而得到心理上的紓緩。「好多人接受唔到長期痛症，一心諗住踢走佢，踢唔走就會被個痛症困擾住，做唔到其他嘢。」
她表示，該活動進行了兩個月，舉辦了「健康管理小組」和「身心調適瑜伽班」，部份參加者特別是婦女反映，失眠及煩躁情緒獲得改善。餘下的活動還包括「穴位按摩工作坊」及「無痛日」，估計整個計劃有220人次參與。
患上類風濕關節炎已20多年的卿姐（60歲），當年患病時只30多歲，令她無法接受，更因此有抑鬱傾向，「根本冇人明白點痛法，真係可以用痛不欲生嚟形容。當時咁年輕，又貪靚，腳都痛到着唔到高跟鞋，你話仲有乜心機出街？」從痛苦中跳出來的她，自擔任再生會義工後，悟出從助人中逐漸接受自己的痛症。
學懂瑜伽呼吸減壓
卿姐笑言：「瑜伽好高深，學咗五堂好皮毛，不過就學識點呼吸同減壓，好有幫助。雖然參加嘅病友所患痛症唔同，但係互相分享經歷，令我覺得自己唔係最慘一個。」
另一名參加者林勤漢（69歲），40年前開始帶隊行山，疑雙腳過勞致膝蓋提早退化。「40幾歲雙膝已經開始痛，初時當跌打咁醫，醫極都唔好，先識睇骨科，原來軟骨出事。咁多年來，每次痛親就好似畀針拮咁，坐唔安，瞓唔落，好痛苦！」林伯6年前雙腳做了人造換骹手術，雙膝勞損始減輕。今次參加瑜伽班，林伯獲得意外收穫，「瑜伽難度雖然高，但係伸展吓筋骨都好嘅，仲可以同其他病友分享經歷，人都開心啲！」
再生會為慈善復康服務機構，致力協助癌症及長期病患者積極抗病，逆境自強，以重獲身、心、靈健康；並推廣助人自助，以樂觀積極態度，活出豐盛人生。
再生會查詢電話：23826963
提醒你：蘋果基金接受申請
為實踐「生命因你變得好」的信念，蘋果日報慈善基金定期舉行會議，審批由非牟利社會服務機構遞交的計劃書，資助創新及有意義的服務，以改善弱勢社群的生活質素。本年度最後一季的截止申請日期為11月15日，社會服務團體可上網查閱有關資料及下載申請表。
蘋果基金電話：29908688
網址︰ http://www.charity.atnext.com
地址︰將軍澳工業邨西駿盈街8號
電郵：mailto:[email protected]