家陣啲家長為咗令仔女入名校，乜嘢法寶都出齊，漏夜排隊攞入學申請表、節衣縮食搬去名校網住……不過，滙豐大班鄭海泉就話，佢讀嘅中小學都唔係名校，「小學嗰間仲執埋笠㖭！」至於中學讀嗰間叫九龍工業中學，嗱，唔好睇小呢間名不經傳嘅中學，佢出咗兩個鄭大班──一個係鄭海泉，另一個就係大家都熟識嘅鄭經翰。
天生我才必有用
鄭海泉話間學校啱啱開，佢本應係第一屆，不過由於呢屆係試驗性質，所以學校唔認，「65年先叫第一屆，我哋64年係零屆。」不過佢笑笑口話，𠵱家佢做咗滙豐首位華人大班就唔同喇。正所謂「英雄莫問出處」，只要自己爭氣，讀邊間學校都會出頭。
鄭海泉又話，一個人要成功，千祈唔好忘記身邊人嘅幫助，好似佢咁，細細個患上小兒麻痹，唔開心嘅經驗實有，但呢個世界總會有人對你好，好似佢鍾意踢波，啲朋友仔見佢唔走得，就叫佢守龍門。
佢仲教啲後生仔點面對困難，「閒時睇多啲近代史，睇吓日本仔打香港時，啲人點捱法，就知𠵱家嘅慘唔算得係乜。有難題一定要搵父母或老師商量，唔好自己一個人煩，困住自己，我喺公司遇到問題，都問啲同事意見，集思廣益嘛。」大班仲講笑話：「呢啲係『就嚟係一個老人家』嘅忠告。」