賭王何鴻燊三姨太陳婉珍、四姨太梁安琪近年爭寵爭上位，早前忽然聯手買澳門環球酒店發展，賭王前晚自爆都是他的主意，盼藉此減少兩房爭執。下月86歲生日的他，直言齊人之福不易享，皆因每到此時需奔波幾房，吃不下也要照吃。
剛榮任傑青的富豪太子女羅寶文，前晚為演藝學院「友誼社」舉辦籌款晚會，以「ImperialRomance」為主題，除其父親羅旭瑞撐場，更有姚煒與趙式芝、區海倫與夫婿、陳妙瑛及利承武等。
賭王何鴻燊一早到場，提到他下月86歲生日，他說：「未有耐，我都唔想記住，我唔認老，生日又要大一歲。」早前本報踢爆近年爭寵的三姨太陳婉珍、四姨太梁安琪，居然聯手做生意，買了有35年歷史的環球酒店，何鴻燊聞言笑呵呵說：「酒店仔啫，買嚟玩吓。」問他是否想兩房融洽，他說：「係呀，我一路鼓勵佢哋，家和萬事興呀！」
打本「陸續有嚟」
談到由誰打本及如何分配擁有權，賭王說：「係我，我買畀佢哋嘅，不過佢哋都有畀啲咁。佢兩個五十五十，最公平，之後陸續有嚟！」問到兩位姨太中那一個較會做生意？何鴻燊說：「安琪叻多少啦，三太就賢妻良婦，打理屋企好好。」又笑着說：「安琪就通世界都飛，啱啱傾代理去咗廣西，廣西就馬騮山最著名，唔知係咪代理馬騮山？」
打本兩位姨太做生意，問賭王會否擔心二姨太藍瓊纓呷醋時，他指二姨太較少做生意，並說：「唔怕，四太好有魄力，去完上海，又去馬拉。」其他姨太不呷醋？他說：「冇，四個都咁錫，齊人之福唔易享，一到新年、生日，我呢，就走到氣喘，食到嘔凸，但都要照食，生意佬，唔可以咁易sayno。」
四太斷納妾後路
賭王笑着說：「𠵱家搵多個都唔掂，阿四（指四太）話咗，四、五、六七八都係佢，冇喇！」賭王講姨太就滔滔不絕，但問到前女婿許晉亨的婚事，及他曾指「質地唔好」嘅楊其龍要翻追何超瓊等，他就一味詐儍：「嗰啲我唔識睇，又唔識聽。」
採訪：JessicaNgan
攝影：DickyChan
