喺香港提起「王緹」呢個名字，大家未必知係邊個，但若然連同超級女聲嚟講，大家就一定有印象。王緹Katy係第一屆超女亞軍，喺內地雖然唔及李宇春、周筆暢同張靚穎等超女紅，但都有唔少支持者，事關Katy聲如黃鶯，甚至好多人覺得佢把聲似足鄧麗君般甜美；除咗聲靚，Katy亦嘗試寫書，一於歌手作家兩棲，點解肯作多線發展，Katy開朗咁話：「我仲青春，唔怕輸，我有本錢試！」
記者：梁美甜
攝影：梁細權
聲如黃鶯 率性自然
好多人自以為青春輸得起，於是乎就乜都試，但就未必如Katy般有計劃同遠見咁試，「無人係Perfect嘅，我希望喺唔同層面去試去學習，所以就邊學邊用，好似香港呢度有好多Professional，我好想喺佢哋身上學多啲嘢，就算扮靚都可以係一門專業嘅學問。」
小記好欣賞Katy呢份坦率，雖然說話聲音柔弱，不至於係雞仔聲，但就好似台灣女仔說話般動聽，但當中嘅語氣卻又非常肯定，流露一份柔中帶率性自信嘅味道。
樣貌實力 兼備
外表絕對稱得上為靚女嘅Katy，雖然話有好多嘢需要學習，但自小移民美國，說得一口流利英語，說話絕對係有紋有路，以為佢好有機心，但同佢傾過偈嘅人都覺得佢好直接、坦白，幾句下來就好像老朋友般天南地北甚麼都講得。
「我不嬲都鍾意古董車，但就只係遠觀，嘻！以前都有揸開車，好似Benz、Honda咁，總覺得歐洲車比較笨重，日本車就輕巧但唔夠時款，所以早幾年開始愛上BMW，覺得佢嘅車大部份都好有線條好Hot，鋼水好性能又穩定，而且揸起上嚟好型。」Katy娓娓道出個人喜好：「我個人好鍾意自由，好奇心又重，所以就算揸車，部車都一定要有足夠空間感同舒適㗎。」怪不得Katy一見到眼前05年款嘅BMW330Ci即時雙眼發光啦！「雙門跑車好靚、好Sexy！」
Katy用Sexy形容330Ci一啲都唔誇張，因為黑色雙門轎跑格，鬼面罩兩端有兩道充滿動感嘅弧線伸展至頭冚，再劃過車頭同擋風玻璃，最後滑過流線型車頂向鴨尾狀車尾才肯收斂，陽光之下，勾畫出精悍神氣以及立體深刻嘅觀感，超型超Sexy，就如擁有樣貌身材兼內在美嘅Katy。330Ci有225匹馬力，實力如Katy般非凡，相信還有大把「實力」同人競跑。
有青春 有本錢
Katy自言未來路線都係以知性、性感、健康，以及獨立自信嘅時代女性形象示人。Katy樣貌、身材、內在，無一不缺，加上佢還後生，所以絕對有本錢去試去闖。「年輕就係本錢，生活要主動接觸同學習先不枉過，係咪？」大家認為呢？
KatyProfile
王緹原名王媞，1999年出道，於北京電視台春節聯歡晚會與成龍合唱《明明白白我的心》，曾拍劇以及參加音樂歌唱比賽奪魁，最為人熟識則係參加2004年《超級女聲》，奪得成都賽區冠軍及全國亞軍，被形容擁有鄧麗君般甜美聲線，同屆冠軍為安又琪。曾先後出過兩張個人專輯，現時以歌及文字寫作為主，行知性半熟女人路線。
BMW330CiCoupe規格
引擎：2,979c.c.直6DOHC
馬力：225ps/5,900rpm
扭力：300Nm/3,500rpm
傳動：6前速SMG半自動波
極速：250km/h
售價：$319,000
查詢：富利堡（28776700）
