經歷過73年、87年、97年三次股災、03年沙士，睇住馮景禧、李嘉誠、李兆基發達，𠵱家90歲高齡嘅高德泰，炒股炒咗大半個世紀，家吓仲每日昅實個市，炒股狠勁一啲都唔輸畀班後生仔。
高德泰係勝利證券嘅老闆，勝利喺30幾年前開業，高德泰話，當年時不時都會喺交易所嘅活動，見到李嘉誠、李兆基同馮景禧，佢自己最佩服係已經過咗身嘅馮景禧，「佢一買一賣睇位好準，次次timing都啱啱好。」
高德泰又話：「喺股市浸咗咁多年，越嚟越覺得股票唔理性，兼且神出鬼沒，尤其大上大落嗰陣，乜嘢20天50天線，根本無用！」咁樣講，當然係因為高老伯曾經「老貓燒鬚」，佢話：「當年曾經揸過佳寧、海外信託同埋嘉年地產，三隻都全軍覆沒！」
千二萬唔賣經紀牌
不過，好彩佢本錢夠厚，所以三隻股票「揩嘢」，都未令佢沒頂；至於本錢厚係嚟自佢揸住嗰個經紀牌，「當年經紀行牌照8萬銀，嗰陣新股上市，例必要分兩成股票畀經紀行，如果上市日即沽，通常都有斬獲，變相無本生利；加上牌照數目有限，所以個牌好值錢，72年已經炒到220萬銀，到90年代，更加炒到千二萬。」千二萬？咁有冇人游說高老伯賣咗個牌，退休歎世界呢呵？「梗係有人叫我賣牌喇，不過我點都唔賣！」
揸住個經紀牌，第一時間令華華諗到，高老伯應該有港交所（388），「當年分到80萬股，不過我廿蚊嗰陣賣咗部份，最近200蚊又賣咗啲。」佢同華華講，家陣要買港交所真係要有膽量，佢老人家就冇呢份膽量喎！
咁佢家吓揸住啲乜？佢話呢啲係「商業秘密」，不過就醒咗幾隻股畀華華。「六行三保裏面我覺得建行（939）最好，有實力管理又好。滙豐（005）就唔睇好喇，佢唔會好似以前咁，始終有中資股搶生意。」高老伯仲話群星紙業（3868）家吓個價高得唔合理。
17歲已經炒期貨
高德泰17歲喺上海銀號做學徒，當年嘅高老伯已經炒得好狼，黃金、白銀、布疋、麵粉，無論實貨定期貨，乜都炒一餐。到50年代，佢用晒所有積蓄，再問親友借咗1000蚊，做水腳兼搞埋啲疏通文件，經廣州、深圳，嚟到香港搵食！
嚟到香港，高德泰做過私塾教師，又行咗7年船，儲到幾萬蚊，就同幾個朋友夾份開毛衫廠，賺到錢再開假髮廠，就係咁搵到人生第一桶金，跟手拉攏兩個老友，71年合資廿萬開咗勝利證券，佢出咗8萬蚊做大股東。