正所謂發財立品，呢兩年唔少人喺股市搵到，唔知係咪呢個原因，所以捐錢都爽手啲，噚日公益金舉行一年一度頒獎禮，公佈本年度一共籌到2.38億銀，比舊年多咗5.5%，創下1968年成立以嚟最高善款成績。
多5.5%歷來最多
今年繼續由滙豐（005）勇奪最高籌款機構大獎，為公益金籌到接近900萬元，獅子銀行已經係連續第8年奪得呢項榮譽，唔係講笑；至於第二名就超人李嘉誠旗下嘅長實（001）奪得；第三、四、五名分別係彩星集團（635）、新鴻基地產（016）同何鴻燊。話市民喺股市賺到所以捐多咗錢，唔係華華老作㗎。
嗱，就因為港股暢旺，好多大陸企業嚟香港上市，中國人就梗係想好意頭，於是有成46家公司，分別捐50萬甚至100萬銀畀公益金，攞番個靚靚上市冧巴。就喺咁公益金就袋咗4150萬銀。
仲有，國泰航空（293）為咗慶祝成功收購港龍，捐咗總值1008萬元嘅中航興業股份，捐得咁豪又咁有意義，所以公益金都禮尚往來，頒咗個慈善家大獎畀佢。