澳門有冇歌手？有，不過數埋唔夠15個！
澳門這彈丸之地，原來也孕育了一小群熱愛音樂的歌手。「小」成點？男歌手大約有10個，女歌手就5隻手指有找。炙手可熱的，有人稱才哥的麥健才，在澳門，他是天王──補習天王！因為，這裏沒有人以歌手為業，只有業餘，那管你是銷量冠軍，還是爆騷王，像才哥，也只能是「補習歌王」！
記者：盧家蕙
攝影：梁細權
參賽21次終攞獎
31歲的麥健才，人稱「才哥」，他說此名由來已久：「當時18歲，仲讀緊大學，喺酒店實習時，啲男仔怕日曬雨淋，成日偷懶唔做嘢，得我一個肯擔擔抬抬，久而久之，啲女同學就叫我做『才哥』，可能因為抵得諗。」不過，自從另一位澳門歌手小肥為他填了一曲《才歌》後，多數人也叫他做「才哥」。
「才哥」地位被肯定，但入行道路卻頗崎嶇：「我是參加歌唱比賽出身的，總共參加了21次，頭20次都係拎最佳台風獎，可能次次都唱快歌，其他參賽者比較靜、唔郁。雖然當時歌藝一般，但揀唱快歌至少都有獎捧回家。」最搞笑是連評判都終於睇唔過眼，忍唔住勸他改唱慢歌：「佢哋話拎第一名嘅人唔會唱快歌！」聽取意見後，才哥終於在第21次的比賽中，以黎明的一首慢歌跑出，奪得第3名，更奪得最受歡迎獎及最佳台風獎！
選佢做特首
2001年出道，風頭一時無兩，首張EP《MacauUnited》，只收錄5首歌，大賣超過1,000張（不錯，1,000張，已創下澳門本土歌手的最高銷量紀錄），不少大學、中學力邀他開MiniConcert，歌迷越來越多。才哥地位有幾超然？網上討論區不少人選他為最受歡迎男歌手之冠，仲勁到想佢接任新一任澳門特首！不過人紅卻沒有高高在上，17歲的小歌迷Pantene說：「才哥會同我哋一齊唱K、飲嘢、參加彌撒，出碟時又會問我哋意見，歌詞填得好唔好、唱片封套靚唔靚之類。感覺好似朋友，我哋會幫佢編接Show時間表，順便做佢助手！」這次訪問，亦由這位小女生代為安排的。
麥Sir講道理
才哥夠親切，還有一個原因，因為他另一個身份是麥Sir，香港人所說的補習天王！聽說才哥的補習社全澳門最大，才哥不置可否：「人哋畀面啫。」經過多番打聽，原來才哥的補習社坐擁過百導師，逾千名學生，收入應該好可觀。不過澳門人追捧才哥，還因為他的一顆善心！他也承認：「補習社有3、4成收入會捐去明愛，亦會捐畀其他慈善機構。」07年的最新大碟《才歌》，連神父都肯俾佢喺教堂前擺賣，全因他分文不收。才哥賺到錢，但就捐唔少，綿羊仔都無架，寧願搭巴士，放工多回家休息。不爛蒲，原來澳門人最Buy。
非一般天王格局
好多人說，澳門民風純樸，有幾純？睇睇才哥這位澳門人氣天王的風格，不難找到蛛絲馬迹。大概你會驚訝，港澳不足一個鐘的船程，竟然會拉出這麼大的一段距離。
怕歌迷太多
先聽聽才哥因為歌迷而起的煩惱：「澳門人支持本土歌手一直都好低調，估唔到女歌迷多起上來，爭執都好多！試過有次聚會搞到一發不可收拾，結果要報差館。」詳情他不欲多談，不過自此就決定，歌迷會人數一直維持40人左右，唔可以太多。
唔可以好潮
貴為澳門數一數二的歌手，打扮當然重要，不過才哥在意的，卻叫人意外：「我唔可以好潮，因為家長、學生都唔鍾意歌手太型，好似今日咁，又Gel頭、恤衫扣少兩粒鈕，會俾人眼望望。」女學生會提佢：「麥Sir，你啲鈕未扣晒呀！」才哥話面對她們就要梳分界頭，着得穩重少少。
唱歌要教化
至於歌曲內容就更嚴謹，他說，不想對下一代有負面影響。「試過收到某名填詞人為我寫的歌，內容講一夜情，我接受唔到。我希望自己嘅歌係有正面訊息，好似啱啱出嘅呢隻碟，多談家長跟子女關係，希望起到教化作用。」
才哥Profile
原名：麥健才
年齡：31歲
歌手資歷：01推出首張個人EP《MacauUnited》，另推出過4張大碟，07年新作為《才歌》。
過江龍小肥：香港歌手夠矜貴
才哥志不在香港，不過澳門的另一位知名歌手小肥，最近就過江搵食，準備在香港大展拳腳。小肥一語道出，在澳門當歌手的辛酸。「在澳門當歌手根本沒地位可言，出碟要自資，助手、Sponsor都要自己搵，出Show時間表、聯絡工作都係自己一腳踢！」不過，樂安天命，似乎是澳門人的特點，來香港，也只是機緣巧合。小肥笑說：「我10年前已開始唱歌，一直冇諗住來香港發展，只係之前幫過李竣一、陳輝陽唱吓Demo，唱唱吓俾Paco注意到，先嚟咗香港。」
不再只有酒廊歌手
在澳門，他也不例外，唱歌是兼職。「我本身是一名設計師，喺澳門跟朋友組成樂隊C-plus，都幾受歡迎，FansClub最多有300幾人。」即使「紅」，但也只是唱別人的歌，「似酒廊歌手。不過近年多了歌手自行創作！」唱作人的冒起，令澳門歌手開始受人注意，他們亦開始放眼香港。小肥一過江，便即時體會到在香港做歌手確矜貴。「𠵱家出入有保母車，又有助手，化妝、服裝都有贊助！衣食住行係貴咗，不過以現時收入來講仲撐得住。」當然，決定留低！
小肥Profile
原名：徐智勇
年齡：你估啦！
歌手資歷：97參加歌唱比賽入行，00年與拍檔鍾楚霖組成C-plus，01年於澳門舉行首個音樂會，07年加盟金牌娛樂進軍香港樂壇。