唔知大家仲記唔記得，QDII啱啱出台嗰陣，曾特首喺銀行公會午餐會度，敲晒枱叫班賓卡唔好掛住打golf，快啲去搵人行行長周小川拓財源。講就係咁講，但係商界、尤其財資金融界，喺高球場傾成嘅生意，真係分分鐘多過喺office，所以時不時就有人牽頭搞吓高球賽，聯誼贏波事小，打通人脈先緊要！
嗱，好似工聯會咁，就公然唱反調，話要喺高球場上慶祝國慶，嚟緊13號星期六，工聯會拉隊上深圳觀瀾湖打高球，呢個賀國慶方法都算新穎。佢哋仲搵埋財經事務及庫務局局長陳家強（圖）主禮，咁咪即係叫陳局長公然反曾特首！講笑啫，何況陳局長淨係負責開波，應該唔會落場露兩手。香港有局長做代表，內地就派咗中央駐港辦社會工作部部長張鐵夫，同埋深圳市人民政府金融發展服務辦公室主任李林做代表。
據華華所知，今次比賽分為「名人賽」同「精英賽」，有成百幾二百人參加，贏咗仲會有獎金，除咗本地嘅大企業，好似東亞銀行、中銀保險、中國銀行、宏利之外，仲有唔少內地財金公司參加，咁大家喺場內打吓波，場外交換吓名片，跟手再約埋食飯傾生意，條路咪就係咁行出嚟囉！