身邊的朋友個個都玩Facebook，有人為了廣結朋友，有人為了識女仔。最近有手機網絡商推出寵物領養遊戲，除日日照顧狗仔之餘，特別之處是可以放在電腦桌面放狗，仲可以相約朋友一齊在msn齊齊遛狗，又多一個玩意識女仔。
記者：馬靜兒
最多養三隻狗仔
《ShallWeDog》有五個品種俾你選擇，就係摩天使、史納沙、芝娃娃、雪橇犬和西摩，仲可以幫佢揀生日、星座、姓名。自問不是狗癡，養兩隻已經足夠。要記住，一次最多養三隻狗仔，到第四隻就要先放棄其中一隻喇！
貼身照顧
既然領養了狗仔，就要用心照顧牠的起居飲食。手機日日都跟身，要照顧其實好方便，至少不用做最厭惡的執拾大小二便。有時間就開機餵佢飲水食嘢，食飽就帶佢散步。仲要安排佢受訓，訓練做倒豎葱、向主人飛吻和扮可憐，總之多才多藝，做得好仲可以表演㖭！
狗仔都要打工
有時都想幫狗仔換新衫扮靚，但世界上無免費午餐，狗仔要着靚衫，買嘢食，都要打工。玩簡單的Flash遊戲，賺取遊戲的貨幣「樂豆」，喜歡買乜食乜都得啦！
剛開始養的狗仔是第1級，如果你陪佢多一點，佢就會成長。每升高1級，狗仔就可以食更多不同種類的食物，着更多唔同款式的新衫，連做動作都有唔同。佢仲好幫得手，設定好時間，就會自動報時，提醒你夠鐘做嘢㖭！
桌面放狗
放工返到屋企，人累了，狗仔都要鬆一鬆，可以俾佢出來走動一下。只要從網上下載遊戲電腦版本，依指示安裝程式，輸入登錄手機版的戶口名稱及密碼，就可以在電腦繼續玩。將手機內的狗仔放在Desktop周圍走來走去，伸展筋骨，又可以用滑鼠摸吓佢，感情都好啲啦！
相約msn散步
遊戲跟其他電子寵物不同之處，是不只局限在手機，更可以走入msn。朋友都有養狗，不妨相約在msn一齊放狗。在雙方的對話框旁，有一個很大的花園，你可以叫同樣有養手機狗仔的朋友，齊齊遛狗，邊Chat邊遛。但只限於WindowLive，至於WebMessenger、ICQ等暫時不支援。
總結：
支援大部份品牌的3G手機，雖然包括熱門手機，但完全不支援PDA手機。平日在公司用WebMessenger，又唔可以約朋友一齊遛狗，未能做到好全面。
收費：M+$15
3（31628888）