香港地做記者，地位唔及外國記者高，日曬雨淋假期少冇OT，簡直係家常便飯，所以好多記者/主播搵到好路數就會嗱嗱聲走。𠵱家股市屢創新高，經濟暢旺，Cable財經台主播買少見少，男主播走完一個又一個，同TVB鬧小生荒冇乜分別。
早幾年陳立恩離巢，華華聽聞佢近日已由羅兵咸過檔新世界發展（017）做公關；上個月就到曾安遜唔撈，走去英國進修一年，讀番個碩士。
主播出身對鏡頭敏感
仍然活躍喺市場嘅前財經主播，相信應該係張敏華（Catherine），佢早幾年喺Cable跳槽去滙豐，之後又再跳槽到花旗，擔任高級投資策略員；除咗喺本報寫投資專欄，亦做環球投資策略分析。噚日，Catherine仲獨擔大旗開記者會。唔知係咪主播出身，Catherine對鏡頭特別敏感，整個presentation，九成時間面向記者，對記者提問一啲都唔怯場。
講起靚女主播，珠珠趙海珠離開TVB之後，就去咗法巴賣「輪」，據聞年薪幾級跳，記者行家恨都恨唔到。𠵱家睇番Cable前行家嘅出路，似乎都好唔錯！