上個禮拜，香港股神李四叔趁觀音託世孫女擺「發實宴」，又出嚟發功，唱旺股市，正係「四叔一開口，股市升個夠」，香港股神呢個朵應該冇人異議喇啩！你咁諗就錯晒，喺網上討論區就有網友發起咗個選舉，睇吓邊個先係香港股神，結果都幾出乎華華意料之外，因為四叔唔係壓倒性當選，反而由「股壇狙擊手」嘅大劉劉鑾雄稱「神」。
Billybenchan就話：「你心目中，邊個係香港股神？我話係大劉，佢狙擊手嚟㗎，眼光好準。」glaylaw：「我都話係大劉，佢無寶不落！」
四叔只係有錢人
至於四叔唔係冇人撐，好似eric2525就話：「投四叔一票。2004年由500億港幣，變到現時接近2000億。」但更多人持相反意見，律君就話：「如果大劉同埋四叔，我揀大劉喇。」ericchengyk亦話：「好多人都話四叔係股神，但我好肯定李四叔唔係，佢只係一個有錢人！」危險大師問：「（香港股神）有咩？有嘅話就唔使做啦，話四叔係股神，都係因為佢以前入嘅股例如：國壽（2628）、神華（1088）、工行（1398）等大升，都係新股配畀佢，𠵱家你問佢有乜股票、行業可以買，我諗佢係好敷衍咁回答你。」
既然大劉爆冷跑出，自然有人跟佢炒，bb8398話：「大劉係股神，貴一貴都追入平保（2318），一定勁睇好！」at88亦同意：「我都因為大劉高價入市，所以死都唔放2318。」
無寶不落跟佢買
大劉自從7月底開始已連番增持平保，直至上個月底，以每股平均價107.68元再增持，家陣佢控制嘅華置（127）同大劉本人合共揸住超過7%平保權益。上個禮拜五，平保收109.9銀。
不過，亦有網友質疑大劉係咪跟得過，Cepa就話：「咁揀大劉為股神嘅人，有冇買佢嘅鎮山之寶華置同利福（1212）。」就咁，大劉跟唔跟得過就好難講，但利福好似應該係細劉劉鑾鴻㗎噃！
除咗大劉同四叔，網友其他嘅香港股神名單仲有，幫政府高價買港交所嘅鬍鬚曾──曾俊華，仲有曹仁超；網友james17就提名嘅「力天世紀葉榮添」，不過，華華反而認同同lyhpsf提名嘅「方展博」。
[email protected]