緬甸僧侶上街，本是和平示威，要求民主自由及為民請命反加價。不過在兇殘獨裁軍事政權眼中，僧侶上街，形同造反，挑戰軍政府，於是下令軍隊開槍鎮壓，死人無數（無數字，多到不知），梗係唔止九個死者啦，你係袁木先至會信緬甸政府。
僧侶自九月五日開始示威，九月二十四日人民加入行列，達到高潮。僧侶上街，仰光市面仍然太平無事，點解緬甸軍政府唔喺第一日就鎮壓，而要等到全世界都有報道，記者湧入緬甸之後先至痛下殺手呢？緬甸拖鞋軍人（日本攝影記者長井健司死前躺在地上；旁邊一位揸槍軍人係穿着人字拖，冇着襪嘅）在二○○七年九月二十七日殺人，其中有乜道理？
道理可能係黑色笑話。一九八八年英國駐仰光大使館文化參贊TomWhite（姑譯之為白先生）對BBC講，緬甸獨裁軍頭尼溫（一九六二至一九八八年掌實權）迷信九（9）字係幸運號碼，其他軍佬受佢影響，亦迷信九字。一九八七年九月，尼溫下令發行新紙幣，面值要俾九除得盡（如四十五，九十），其他紙幣唔要，搞到社會大亂。緬甸民間民主運動就喜歡八（8），在一九八八年八月八日（後稱8888運動）上街，搞咗一個幾月，到一九八八年九月十八日，軍隊出街殺人，殺到血流成河，白先生話，九月第十八日，一加八等於九。到咗今年二○○七，軍隊又試容忍示威大半個月，到九月二十七日開槍。第二十七日，二加七又係等於九。然後緬甸軍政府發動人民上街集會支持政府，譴責外國勢力挑撥，有幾多人參加集會呀？官方話有九萬八千一百人（9，8+1）。
白先生話緬甸軍政府好迷信，不但迷信9，仲迷信佢哋殺人，鎮壓人民係為咗國家穩定團結，迷信外國殖民主義不斷干涉緬甸內政；西方政府同緬甸政府講民主，講人權，簡直係緣木求魚。
既然係咁，到咗2009年9月9日，緬甸軍政府會做出乜嘢令人思索唔到嘅事呢？唔通緬甸軍政府真係可以長長久久咁樣統治緬甸，當人民係狗？佛祖有靈，請以巨靈之掌摑醒啲狗軍。