大覺瞓之後，上個禮拜，大笨象（005）終於靜極思動，做番隻小飛象，連升幾日，有網友問：「大笨象係唔係已經醒番啦？」回應當中，過半數人都好樂觀，話會全力掃貨，但都有近四成人話大笨象好快又瞓過，另一成多啲人話佢未完全醒番，要小心。
唔離棄實有一日報答你
網友chinafund話：「佢日日升，睇嚟真係醒晒喎。」kalvin914好有信心咁話：「（大笨象）醒咗一排啦，好清醒，等有機會再入。」shin_frankie講埋數據，「成交量極大，呢鋪唔係玩㗎啦！」sekseong插嘴，「都係時候輪到佢起身！不過我買佢都係貪啲息！」
kalvin914aiya好體諒大笨象，講到呢隻股好有人性，「銀行股係慢少少，不過勝在穩陣，佢又跌唔到落去，用嚟收息都好吖。而且北水流落嚟，一定會升！唔離棄佢，佢實有一日報答你！」Oracle_Box就話，「入得大象都唔係走短炒啦，係都入call啦，今日（上個禮拜三）成交咁勁，仲有排上。」sudan1一於叠埋心水，「等靚位入。」
全力掃貨唔到168唔放
不過，有啲網友唔係咁淡定，尤其見佢總係衝到150關口又落番嚟，企唔硬，jack98就擔心：「未完全醒番，小心！除非收市150以上，如果唔係又瞓過，升唔上現價149.9。」Vinx亦唔多睇好，「佢聽日又瞓過！」其他網友望佢唔係烏鴉口啦。
但到禮拜五大笨象繼續衝上，網友一於少理，v.romeo話：「PE得13，唔買就笨。」hihiivy247仲咬定，「全力掃貨，唔到168唔放。」two慫恿佢：「到200先放啦！」而禮拜五收市時，大笨象終於如網友所願，收報150.8元，呢個禮拜就知大笨象係咪真係飛得起。
http://www16.discuss.com.hk/viewthread.php?tid=5454771&highlight=005