十月二號三號兩日，強烈季候風襲港，左丁山屋企大廈面臨空曠地區，風勢好似特別猛烈，凌晨有大雨，雨點拍打鋁窗玻璃，嘈醒咗左丁山，聽到窗外風聲虎虎，仲以為係掛咗八號風球㖭。
早上看報，知道有好玩者趁風高浪急，到石澳滑浪，游泳，累得救生員冒險營救。照計泳灘掛上紅旗，泳客應該自律，唔好落水先至啱。偏偏世界上有人鍾意逞英雄，顯威風，係要冒險下水。救生員不能見死不救，見人就救，於是呢班玩星有恃無恐，好似炒家知道格林斯潘有GreenspanPut，伯南克有BernankePut咁，知道唔會死得人嘅。最後邊個付鈔？當然係我哋納稅人啦。
左丁山以為康文署應該按照救生員當值成本，再乘大五至十倍，向凡在泳灘掛起紅旗之後，仍然撲落水而卒之勞煩救生員救命嘅玩星，發出賬單，要佢哋找數畀錢，作為救命費，如果不幸在挽救過程中，救生員有所損傷，當事人更要賠償。如果啲玩星認為收費太貴，佢哋不如去夏威夷滑浪啦。
與消費L（L君已自消委會退休）講起，L君話：「唔講你唔知，我就係石澳原居民，自小就在石澳泳灘嬉水，有時大浪冚埋嚟，唔少同伴被捲出海。老人家教我哋啲細路唔好與大浪對抗，一定要保持鎮靜，順其自然，漂流出去，到咗後浪推前浪之時，啲浪水就會將我哋沖近沙灘，到時就順勢猛游水上岸。」又咁啱嘅，既係原居民，有冇丁屋一間，俾我哋班朋友借用做石澳沙灘屋充吓大班呀？消費L話：「唉，新界原居民先至有丁屋，我哋香港島原居民就冇行，此乃歷史因素，拗數都多餘。」歷史因素就係英國與大清皇朝簽訂嘅九龍新界租借條約，保護咗新界原居民。
聽消費L講如何應付大浪，諗諗吓，記番自己在馬來西亞刁曼島遇上風雲變色，陽光普照突然變成傾盆大雨，在海中掙扎之舊事。消費L講得啱，如非當時大浪拍岸，左丁山根本就冇法子順勢返埋沙灘。當時沙灘啲救生員一見到落雨，立即全部走晒，根本冇人下水相救。比較吓，香港啲救生員非常專業！
（今日下午四點半，中文大學何善衡工程學大樓五樓舉行唐君毅訪問教授公開講座，請勞思光教授以普通話主講「哲學課題之變與常」，值得一聽。）