同事鮑魚清呢排成日陰陰嘴笑，睇怕佢同四叔一樣，喺股市大有斬獲。叫得做鮑魚清，可想而知佢食鮑魚多過我哋食米，但佢近日有個鮑魚嘅問題問我。
佢話有個喺新西蘭經營亁鮑生意嘅friend，同佢講新西蘭鮑魚色澤偏暗啞灰黑色，但喺好似香港等地方市面有售嘅罐頭新西蘭鮑魚，顏色就比較淺色，有行家流傳話係因為有人用啲山埃嚟漂白喎，嚇死鮑魚清，因為佢雖然成日食日本亁鮑，但有時都食吓罐頭新西蘭鮑丫嘛。
我咪打電話畀安記海味董事總經理潘權輝問清楚。輝哥話：「冇咁誇張！」佢話可能因為罐頭新西蘭鮑落咗「酸度調節劑」先令人誤會啫。佢解釋，新西蘭鮑因為嗰邊海水嘅關係，色澤比較又暗又綠，賣相唔好，所以製成罐頭鮑前會用「酸度調節劑」去將鮑魚漂白少少，但呢種調節劑係國際認可嘅，絕對安全；況且新西蘭鮑味道都唔錯，大約100至300蚊一罐，都幾受歡迎。
逢周一至周四刊出