麥家琪上月底一索得男，為大律師老公王國豪誕下重6磅7安士男嬰，母子平安，家琪同囝囝都已經返咗屋企休息，馮仁昭噚日就打畀佢恭喜呢個金豬媽咪。
認重男輕女
第一次做媽媽嘅家琪喺電話笑唔停，佢話：「囝囝好得意，本來諗住生一個，見到BB咁得意，我諗都會計劃等身體調理好再生多一個，等囝囝長大有個細佬或者妹妹做伴。」性格爽朗嘅家琪一直恨生仔，呢次如願以償，佢話：「我承認自己係重男輕女，因為男仔冇咁令人擔心。」
家琪陀住BB嘅時候已經知係仔嚟嘅，所以產前已做好一切準備，包括添置嬰兒用品同改名，佢話：「老公話囝囝要改J字頭嘅英文名，所以改咗JohanWong。」有子萬事足嘅家琪，𠵱家有乜嘢都要以對囝囝利益做大前提，佢話：「我都有問過嚟幫手湊BB嘅阿姨，佢都話我偏心錫囝囝多過老公，梗係啦，佢係我個仔喎。」家琪盡量親手照顧囝囝，但當老公放工返屋企，佢就好識做將囝囝交畀老公照顧，好讓佢哋兩父子爭取時間親子樂。
唞夠先復出
亞視好心急要家琪下月復出，佢話：「老公就隨得我，不過佢最擔心係我嘅身體狀況，要我唞夠先，但拍嘢時間唔固定，到時一定會好掛住BB。」