話咁快又一個禮拜，可能因為港股好似過山車咁，所以覺得時間過得特別快，前兩日個市跌咗1200幾點，昨日又追番857點，做錯邊都唔知點算。
國內同胞呢個禮拜嘆世界，享受緊國慶長假期，同胞餓炒股餓咗咁耐，下個禮拜入番場，應該會造好，有機會帶挈港股再癲過。繼續用國企股做主力，加埋啲托市嘅主角，應該搵到食。
正股上升形態未改
花旗股市前晚悶到嘔，個個都昅實昨晚公佈嘅就業數據，以前個個都驚就業數據唔理想，𠵱家風水輪流轉，前晚睇電視聽節目主持人同分析員傾個市，態度上好似希望數據唔好，當然唔係因為佢哋心哋唔好，而係佢哋認為如果數據唔好，聯儲局下次會議減息機會會好大，呢個諗法亦係市場嘅諗法，睇番花旗𠵱家嘅情況，加埋暗淡嘅前景，睇嚟就業數據都唔會好，或者昨晚花旗股市就會炒減息而大升。
如果花旗股市高收，港股下禮拜一就可以食住個勢炒上，但近日喺高位嘅反覆比以前勁，因住港股會出現短線雙頂嘅走勢，炒輪嘅策略要再穩陣啲，有糊就要食。
滙控C輪9892：滙控（005）昨收150.80元，升到第4日，波幅細咗，成交縮咗，但無破壞到上升嘅形態，160元應該係第1個目標，買啲滙控C輪9892短炒，隻輪昨收96仙，槓桿率15.7倍（有效10.3倍），對冲值0.67，正股升上160元，9892應該喺1.65元樓上，正股跌穿147.50元止蝕。