泛民議員出盡辦法提醒市民今日去維園開遮撐普選，醫學界議員郭家麒連「妾侍」都要上陣，公開亮相幫手做宣傳。郭醫生呢位「妾侍」94年入門，真身係法國雪鐵龍Citroen2CV古董車。佢話好鍾意架車外形，獲一個瑞士銀行家轉讓，當年花咗幾萬蚊買入。
郭醫生話唔計停車場費用，每年只要使一、兩萬蚊保養架車，「架車冇電子設備，只要定期搵人檢查機件、引擎就得。」佢話不時會揸架車兜風，令機件運行唔會老化。要將架古董車變身「2012普選號」，郭醫生今次落重本使咗五、六萬蚊翻新，今日會泊喺維園畀市民欣賞吓，不過大家唔使打佢主意，郭醫生話唔會割愛。