ChinaPlay逐瓣炒，水務股開始有勢，細隻嘅，可揀國中（202）。國中最新NAV0.11元，現價（0.123元）無折讓，但P/B只得1.1倍。其他升到飛起嘅同類股，全部兩倍至6倍，國中抵搞。
國中P/B低，部份原因係水務業未發力。但要咁睇，國中除咗秦皇島、馬鞍山及昌黎三地污水處理項目，亦同漢中市傾緊一項供水工程，預計今年底落實。連埋新增業務，估計到時日均保環水務處理量，幾乎倍增到32萬噸。水務業收益有爆炸性增長，市場自然秤先啲，P/B肯定唔會長企低殘位。
再講，國中呢期亦計劃收購A股黑龍，再將水務業分拆呢家A股上市。A股狂牛，若然分拆成事，國中母憑子貴，家底肯定水漲船高。以國中P/B1.5倍做目標，國中要見0.165元，等如現價要翻半番。
丹楓大隻蛤乸隨街跳
低位撈定丹楓（271），冇蝕底。現價（0.81元），市值得9.2億元，上半年賺1.32億元，大增4.4倍，點計PE都係抵到爛。
丹楓淨係揸南區紅山半島17.1萬方呎，呎價萬一銀計，講緊值18.8億，係市值嘅2倍。仲有其他物業如尖東港晶中心、油塘及香港仔工廈，總共超過51萬方呎。丹楓真係大隻蛤乸隨街跳。落少少注碼撈啲，等上番7月高位1.38元，回報和味。
錢雋