李家誠、徐子淇為愛女李晞彤擺的「發實宴」第二晚，徐子淇戴上老公獎勵她生女而送的千萬鑽石頸鏈，甜蜜細數如何寵壞女兒，而老公也為囡囡學影相。李家誠強調不會教育女兒嫁個有錢人。而「亞洲股神」爺爺則繼續豪氣，為千萬發實宴埋單找數。
「亞洲股神」李兆基愛孫、李家誠和徐子淇女兒李晞彤（Leanna）的超豪發實宴，昨晚繼續在中環四季酒店舉行。第一晚城中富豪雲集，昨晚出席的賓客則以李徐兩家親友、李家誠徐子淇朋友以及恒基員工為主，包括李兆基的三哥李兆麟、五弟李達民等，徐子淇閨中好友陳君宜、化妝師GaryChung以及雲大棉媳婦雲何婉薇等。
爺爺李兆基昨晚仍然是最早到，他於6時半已到場，他甫見記者第一句話即說：「噚晚叫彤叔（指鄭裕彤）上台，因為彤叔送咗金豬，想啲後生快啲生多幾個。」問他將來金叵羅孫女是否非富豪不嫁？他說：「咁早，佢得兩個月咋，講咗都冇用，不過十幾年後啫，梗係睇到（佢出嫁）啦。」問兩晚飲宴是否由他出錢包起，李兆基說：「冇所謂，好少啫！」
成長印記
李家誠打燈學攝影
及至晚上約7時10分，打着紅色呔的李兆基，與李家誠、徐子淇一同見記者，繼澳洲婚禮後，徐子淇再次十分識做錫老爺一啖。徐子淇頸上換了一條閃亮的鑽石頸鏈，配以巨形鑽戒，她直認是老公獎勵生女的禮物，她說：「老公送，forBB。」問李家誠是否如婚戒的鑽石般由自己掘？他即時說：「講笑啫！」
李兆基多次透露恨再抱孫，李家誠現時是否不設防？他說：「呢啲唔出得街，幾時再生？你𠵱家問我太早，下年呢個時候先再問啦。」問到湊女經，徐子淇即時大讚靠晒老公，她說：「Martin教會好啲，我陀BB時，諗住我哋一個做好人、一個做壞人，初期我諗住嚴啲，爹哋就負責陪佢玩。生咗之後，我好縱個女，喊少少我都心驚，佢一扭我就抱，反而Martin就控制到。我哋要做個好榜樣嘅父母，例如佢做功課，我哋就唔可以睇電視。」李家誠補充指自己不是嚴父，他說：「唔好話嚴唔嚴，用適當嘅方法教佢。」
那麼李家誠及徐子淇又會否擔心囡囡將來亂識男友？李家誠說：「我擔心BB健康多啲。」子淇則謂擔心學業，問到李家誠可會教囡囡將來要嫁個有錢人，他即時說：「一定唔會咁教！」子淇聞言搶答說：「啲人成日咁樣嘅心態係唔啱，最緊要嫁個好男人，重要過嫁一個有錢人好多好多倍。」
Leanna萬千寵愛在一身，問兩人湊女有沒有趣事？子淇笑說：「好開心！日日睇佢個樣都唔同，每日多啲反應，識得𠵱𠲖呀呀，𠵱家Martin為咗囡囡學影相，搵咗個攝影師嚟學，𠵱家識得打燈影，影咗囡囡三幾次，佢大得好快，次次都唔同樣。」至於子淇自己則負責為囡囡打扮，她說：「我好鍾意幫佢扮靚，佢好似公仔咁，好多頭髮，可以紮噴泉辮仔，有時又換吓娃娃裙。」李家誠又指Leanna父母都跟，但不會為湊女而不返工。
四叔興奮
讚孫女小嘴似子淇
此外，前晚Leanna的發實彌月宴場面溫馨，據場內人士透露，被爺爺形容為「觀音化身」的Leanna十分乖巧，由媽咪徐子淇抱住出場，逗留約半小時，全程既沒有喊也沒有扭計，不停微笑及好奇地四處張望，雖然Leanna只得兩個多月大，卻精靈地懂得揸拳頭「請請」，逗得場內賓客非常開心。爺爺李兆基比兒子李家誠、徐子淇更興奮，全晚滿場飛與賓客敬酒，他指自從小孫女出生後，全家上下比以前更快樂，又認為Leanna的小嘴似足媽咪，而高鼻就與爹哋一模一樣。
採訪：梁錦雯、顏英儀
攝影：陳俊強、陳順禎
