區議會選舉開始提名，但選管會就未公佈投票站位置，有候選人向選管會查詢，對方話稍後先刊憲公佈。有候選人同八方講，咁搞令佢哋好難做，因為宣傳單張要印埋票站地址，話畀選民知去邊度投票，缺少呢樣資料，影響可大可小。
據八方所知，選管會暫時未能公佈票站位置其實有苦衷，因為想搵適當地方做票站唔易，尤其係鄉村地區，好似大埔船灣區就有阻滯。
汀角村代表胡立強話，選管會早前建議喺布心排村村公所增設票站，不過該處對出馬路係單線雙程行車，又冇紅綠燈過路設施，村民喺度出入投票好牙煙，經村民投訴，選管會決定將票站改設喺大美督村公所，等大家安全投票。