香港人慶祝國慶只得一日假，但內地國慶係大節日，邊有咁快慶祝完，散戶都仲休息緊，有網友見冇市，就喺《網易股吧》問大家節日後開市會點玩，大部份散戶都話會玩到明年北京奧運，似乎當市道嘅風高浪急冇到。
有審慎嘅網友話會「觀察幾日，見機行事」；少數更加好小心，指「一開盤就跑」；但更多嘅散戶依然㷫烚烚話：「持股。」
唔玩短炒嘅58.61.84插嘴話，「長期持有，睇好中國經濟發展。」59.61.10好有計劃咁話：「短線一個禮拜內觀望或離場，長線一個禮拜內觀望或持有。」總之就一個禮拜內速速決定。
58.19.178就覺得，「使唔使咁擔心呢，天又唔會塌落嚟，中國股市係社會主義股，冇外國咁危險，而且中國經濟一直發展緊，又冇倒退，呢兩年搞奧運，正係炒股好時機，我撐A股。唔單止持有，仲要大量買入，堅信中國𠵱家嘅股市唔再係以前不堪一擊嘅股市！」