時勢做英雄，賭波都要跟紅頂白，長捧阿仙奴贏到笑呵呵，相反追AC米蘭反底，盞得個桔，呢次又上一課。今次貼士貴精不貴多，喺國際賽臨近前，全捧強勢班霸大炒贏波搶1哥位。主打英冠，捧2哥查爾頓殺退弱旅班士利，另外兩隊分別為英超2哥曼聯同荷甲3哥燕豪芬「主勝」及入球「大」。
班士利不宜高估
好多人都話英冠難貼，我都曾經講過原因，球隊多踢硬橋硬馬波，水平不高，季初勢無明顯強弱之分，另外當然係有冇刨開或者有冇睇過直播就亂賭。不過打咗五份一，形勢初見眉目，目前1、2哥都係上屆喺英超角逐嘅降班馬，屈福特同查爾頓喺呢個打錢嘅遊戲，都放走過一位身價逾千萬鎊嘅球星，用以套現喺今屆重整旗鼓，初見成效唔錯喎。
上個禮拜我貼屈福特贏黑池失手，但有跟開嘅波友，都知道我周中喺擂台命中高雲地利3.9倍主勝、屈福特W同西布朗和史篤城，唔係死撐，只想大家知道力不到不為財，自信今屆不斷鑽研，貼英冠命中率會對得住波友。
查爾頓今季主場硬淨，已錄得3連勝，射手伊維路莫同華尼腳風正順，中場鄭智同安祖列特攻守兼備，今迎上季苦撐護級成功嘅班士利，睇死後者唔夠料喺季尾維持現時前列位置；周中3球破布里斯托城今屆不敗身，呢份霸氣可一不可再，由氹仔主場到作客查爾頓，難逃一敗。捧單W及「主勝」均可。
博曼聯燕豪芬炒魚腩
另外，曼聯上場贏羅馬兼備運氣，今次對魚腩韋根，問題只係贏幾多球，班生牯仔實玩謝韋根條遲鈍防線；至於剛失意歐聯嘅燕豪芬，返到主場對魚腩嘅威廉二世必變身，開到[-2]仲正！
近5場往績：輸贏贏贏輸
蘋果波神
股市大旺，英超盛世，大家齊來贏多啲！
想同蘋果各路名家傾波經、論盡足壇？請即登入
http://hk.myblog.yahoo.com/footballexperts/