踏入高清年代，只要提到高清兩個字，已經足夠引起人興趣，不過現時大多數人仲係透過高清影碟去接觸到高清世界，其實，更為貼身高清電視廣播亦正在密鑼緊鼓，預計08年1月1日就會正式開播，香港兩大電視台無綫同亞視亦已經開始測試階段，用家只要加個機頂盒就可以率先欣賞到電視可以有幾高清！
記者：許福合
攝影：伍慶泉
Model：Fion
機頂盒必備
唔知大家仲記唔記得當年加入Nicam雙語廣播時，由於當時發售中電視都未支援Nicam功能，所以想第一時間享受到Nicam樂趣，就惟有購買外置機頂盒。即將開播高清電視情況亦相近，相信短期內觀眾都須要額外額買高清電視機頂盒先可以欣賞到，筆者試睇當日就用上Creation數碼電視機頂盒作測試，其外形就同有線解碼器差唔多大小，接駁方面非常簡單，只要接駁上RF天線，就可經HDMI、色差輸出畫面，使用上亦如同普通電視一樣，須要Set台，可以使用掃描或自訂頻道，操作簡單，加上有中文介面，難度應不大。
查詢：盈聲電音（35718380）
免費任睇
除咗機頂盒外，用家另一個最關注嘅就係收費，因為開播時無綫同亞視都同樣會以免費廣播形式，所以用家基本上除機頂盒外，就毋須再額外付出其他費用，內容方面，除咗現在4個免費台外，仲會有額外4至5個高清台，用家加裝機頂盒後，就能夠欣賞到總共8-9個台。畫質方面，最高可以去到1080i質素，當然能夠配合高清電視16:9畫面，將來睇波或來年睇奧運，效果一定正好多。數碼電視除咗聲畫都較佳外，更能消減雪花或鬼影問題，另外將來亦會加入互動電視服務，玩法會增加唔少！
試睇測試台
現時無綫同亞視都在測試當中，不過筆者試睇當日，亞視剛好停機調校，只能接收到無綫訊號，現時所見，無綫有兩個頻道正在廣播，分別係HD同SD台，內容都係一樣，片長大約係20分鐘左右，官方測試時間只係辦公時間內，但據行內人士表示，頻道現時24小時都可接收得到。
聲畫評語
若果以大吋數如40吋以上高清電視欣賞，HD同SD兩個頻道相差幾大，HD無論影片解像度同清晰度都相當唔錯，不過SD台質素明顯不足應付，連字體都又鬆又矇！而聲音方面，高清廣播將會支援立體聲2.0及AC3，如Creation機頂盒更內置有Optical輸出，方便接駁音響系統。
支援舊式CRT電視
究竟邊種電視先啱睇高清電視呢？首先，高檔全高清LCDTV或Plasma，無論質素或功能都能夠提供到最高質素畫面，而未達FullHD級電視使用上亦無問題，不過最好具備HDMI介面，否則只能經色差欣賞，效果就差得遠！如果你仲用緊CRT膽機，亦可以經色差接駁機頂盒，但當然睇唔到高清效果，不過就可以連新增高清台都可以睇到，而原有4個免費台，質素亦好咗。
接收範圍
另一個疑問就係屋企究竟收唔收到呢？行內人士就話一般政府樓房，例如公屋、居屋等，改善工程已經進行，接收應無問題，另外單層次、少伙數樓房，無經過放大器接收，亦應可收睇得到，至於私人樓方面，最好就要問吓物業管理處方面。
HDVSSD
上文提到無綫有兩個高清台正在測試，其內容都一樣，分別係一個屬HD級，另一個只係SD質素，視覺效果都相差幾遠，而機頂盒亦將會有分HD同SD之分，兩者售價大約相差1千元左右，若有心欣賞高清電視，當然花多些少買個高清版會睇得爽好多。SD版個人認為只係供仍在使用CRT電視用家使用，購買時記得認清楚喇！