個市升咗咁耐，細價股就跌足咁耐，到噚日終見有錢買啲細價股上去，似乎個別細價股已不甘寂寞，伺機反攻。不過，一線股係咪已經升完仍未可料，現在就說細價股翻身，似乎言之尚早。
二線股中以基金股最有潛力炒上，例如太平洋恩利（1174）就作勢想炒，基金股中若有H股身份，炒上潛力更大，而H股中唔單止主板股，創板亦都有。
動作多多可憧憬
安德利果汁（8259）昨升6.4%，公司日前宣佈，以總代價210萬美元收購青島南南飲料70%權益。管理層指，透過是次收購，預料集團下一個榨季之產能將由目前每年25萬噸，增至每年28萬噸，未來1年會投放1億元人民幣用於改造設備和收購，期望未來兩年產能可達至35萬噸。
收購擴產之外，安德利近年亦積極增加產品種類以提高毛利，除咗毛利率高達40%的果膠之外，集團改造旗下生產線後，計劃明年榨季可推出果醬，初期產能約在5千至1萬噸，而果醬毛利率料可達30%，較濃縮果汁的20%毛利率為高。
預測PE僅10多倍
受惠於新產品及售價提升，集團上半年純利6050萬元人民幣（下同），急增17倍，每股盈利3.3分，若全年純利能夠維持上半年表現，其現年PE只係10多倍，一啲都唔貴。公司除咗已通過股東會轉主板外，亦會10合1變成1美金以上嘅正式基金股。
其實唔使合股，上SDI睇睇佢股東陣容就已經知佢實際係基金股，西京揸28.5%、三井物產揸12.12%、景順及IFC分持8.4%及7.4%，連同摩通及滙豐投資等已持達76%H股，真係基金到唔基金，配合以上收購及合股消息，應該仲有得炒。