少女們拿着花束，一瞧見她們要等的人，便瘋狂叫喊撲上去拿簽名。等的，不是棒棒堂，而是舞台劇演員——梁祖堯是也！唔識？佢就係何韻詩《梁祝．下世傳奇》周國賢以外的男主角。「哦……」有少少印象，講多兩講，何韻詩新碟短片《午餐肉》佢又導又演、MV《滾》由佢執導、連《地海傳說》的中文主題曲填詞都有佢份。佢套新舞台劇《小人國》話「梗有一個小人喺你左近」，又確實估你唔到梗有一個小人──物阿祖喺你左近，人生如戲，應景到爆！
記者：馮冠芝
攝影：譚盈傑
香港地遍地襟冰人
今次《小人國》嘲諷香港小人當道，到底甚麼是小人？「你去打小人那些人便是小人。」說得具體，阿祖其中一個角色為「唔知點解去咗外國幾年就唔識講中文的偽鬼妹港女」，亦有以襟冰（complain）為己任的腌尖腥悶基明星，浮誇爆笑。回想起來，又真係覺得香港遍地襟冰人。套劇一針見血寸盡港人，阿祖卻不是憤世怒青！相反，佢哋寸港，皆因愛港：「香港人與人之間隔膜太大，互不信任，以致大家要化身小人來保護自己、生存。」記者是香港人沒自覺，但因為台下阿祖的「小人國」，不是小人處處，而是朋友家人戀人動物全在阿祖左近，難怪他對香港人的冷有如此體會。
由自己窮為朋友無計
記者沒有誇大，阿祖的朋友由荃灣排到柴灣，個個交心個個出名，何韻詩、周國賢、林一峰……阿祖是一個小人──物，能耐是他不像劇中小人斤斤計較，他對朋友：無計！「友誼是最獨一無二的感情。愛情有條件，親情係天注定，惟獨朋友明明有得揀，但又唔會計！」
兩年前，他與何韻詩合演《梁祝．下世傳奇》引來觀眾關注，名氣大，自然亦有負面報道，話佢為錢狂接job，搞到人又殘表現唔專業。講到佢好似借明星朋友賺錢的小人咁。但數勻他填詞執導百足咁多job，原來好多係為朋友做，一個仙都無落袋，你便明白，他所說的「無計」：「賺錢唔係用呢啲job啦！阿菇（何韻詩）係好朋友，件事又好玩，我諗都唔諗就幫佢拍咗大碟短片啦！都無收錢。要養家，我係應該在中小學教班以維持收入！我都試過亂接嘢做，一日當27個鐘咁用，後來我發現咁做只會摧殘自己的藝術生命，所以我決定由我自己窮！」
走出舞台離開是為了回來
唔為錢，只為朋友？記者小人上身，唔信世上有咁清高的人。阿祖自03年起，《馴情記》跟林一峰合作、《一期一會》與at17的盧凱彤、谷祖琳等合演。明星效應，阿祖儲了一堆為偶像初踏劇場，然後愛上他及舞台劇的fans。妹妹仔當阿祖係偶像！仲唔俾記者捉到佢想從小人物化身為偶像？他卻說：「固然好！我不是明星，不靠形象賺錢，我飲酒被記者影到又如何，我唔覺得自己飲酒有咩唔健康。反正她們喜歡的是我台上的角色，與台下的我無關！」然他為Twins的演唱會中編導舞台劇、at17的《我們的序幕》有份唱和音、連《地海傳說》中文版主題曲都撈埋，真的沒想過跳出舞台，至少學王祖藍，跳出舞台企喺公仔箱換來更大名氣？「配音可練voiceacting、導演可訓練演員的理性思考，當我知道演戲就是我的中心點時，我去邊都可拿取有用的知識回中心點。」原來阿祖接的工作，全作為舞台演員的準備，終於驅散記者心中小人。
一席話，我看到同樣舞台出身的兩個阿祖。同樣百足咁多演藝job，梁祖堯，回歸舞台中心；王祖藍，從舞台中心出發。於是我信，梁祖堯不是第二個王祖藍，他甘心當個小人──物，活在小人國的舞台裏。
《小人國》
地點：香港藝術中心壽臣劇院
日期：
10月12-14、16-21日（8pm）
10月13、14、20、21日（3pm）
票價：$240、$200
查詢：91009341（W創作社）