兩年前，食肆夥計人工4千，現在升至近萬！
最近的所謂經濟大好，換來的是通脹急升，小市民百上加斤。政府自欺欺人，不停唱好經濟，實際上，自沙士後，租金人工不斷飆升，情況越來越不利投資。反而澳門，在不少香港人眼中，還有半點空間給他們腳踏實地去幹一番，那怕有博一鋪的心態。不過，最近一年澳門起飛速度加快，是否最佳投資時機已過？
記者：張一豪
攝影：黃子偉
小本投資
成本漲不易為
「舊舖做到17號，11月1號新舖開張。」現在叫「火龍湯」，將搬遷到幾十步之遙的新舖，改名為「火龍媽媽」，伙頭大將軍聲仔再三叮囑，怕那兩個星期真空期客人從香港過來摸門釘。阿聲和家姐阿Ann，兩年前來澳門開舖，由以前只有6張枱的小舖，到新舖將升級為有12張枱左右，這一切都由同一間廚房開始，「我同阿聲喺香港都係做廚房嘅，不過做大集團，即使有人識欣賞都無人識得你，所以一直都想自己開。不過香港成本高，我哋有個澳門親戚提議喺澳門開，而且我啲細路仔都喺外國讀書，無後顧之憂，所以就決定同阿聲一齊過嚟。」阿Ann回憶最初來澳門搞舖的因由。
人工倍升請人難
「過到嚟第一件事就係睇貨源，做食肆貨源唔新鮮乜都係假，呢度近海，靚海產好多，可以喺下環街街市、水上街市拎到靚貨，加上當時問過舖租都係3、4千蚊一個月，覺得有得搞就開始。其實有個熟環境嘅澳門人幫手搞手續會較好，否則好易受騙。」阿聲說。「呢個舖最好係有飲食牌，不過近遊客區，要成8千蚊，但可以接受，就決定搞。」
澳門開舖成本平，不過人力資源是最大問題，「喺澳門搞舖，請一個員工要15日內到財政局申報，否則要罰款，每次試工幾日覺得個員工幾好就去申報，但好多做唔夠一個月又話唔做，要去取消，我印象中到現時為止有成20個夥計都係咁。最初過來，人工好平，MOP4,000左右都可以請到人，搵靚材料又容易，係一個幾理想嘅飲食創業地方。」但賭業帶來經濟起飛，問題越來越多，「𠵱家人工貴咗接近一倍都請唔到人，我𠵱家嘅夥計，都係因為年紀大賭場唔請，搬舖後都要考慮請外勞。仲有就係舖租問題，因為加租我先搬。」阿聲慨嘆生意越來越難做。
守得住有發展
「我哋當時拎20萬左右過嚟創業，𠵱家乜材料都貴咗3成，又人工高，租貴，粗略計𠵱家拎30萬過嚟，都好勉強。我哋做咗兩年，幾經艱苦至守到啲客，澳門人唔會貿貿然試新嘢，我哋頭半年都係得4、5萬生意一個月，搵唔到自己份人工，好彩當時人工平。後來慢慢做到啲口碑，𠵱家總算守到熟客做埋朋友，好食會讚吓你，又經常問候吓你，感覺好Warm，呢啲係賺錢以外嘅滿足。不過如果𠵱家想過嚟，其實唔係唔得，不過要預多少少資金，同埋預咗請人好煩。」雖然不知道澳門發展的步伐甚麼時候停下來，阿Ann跟阿聲兩姊弟就細舖搬大舖，用行動投下信心一票。
重鎚出擊
一張單兩三萬
小本經營，蝕了，從頭來過，亦有人睇好澳門前景落重注，「湘臨天下嘅總投資，大概$2,000萬左右。梗係覺得有得做至會過嚟。」光哥氣定神閒，一副生意人本色。拍檔Sunny哥更搬過來澳門每星期長駐6日，長期抗戰，他們都投資過一間曾代表香港最光輝年代的著名夜場，結業後便連同一班合股人轉戰濠江，「當初金都酒店希望有一家大型夜場，所以向我哋送秋波，而中間人就拉攏我哋跟北京好出名嘅湘臨天下合作，我哋十分睇好澳門嘅旅遊業前景，尤其係賭業，贏錢嘅賭客一定肯花錢，所以除咗搞娛樂之外，仲搞埋食肆。」
主力用外勞
光哥對前景充滿信心，「呢度淨係裝修都用$1,200萬左右，大約$800萬做營運資金，過嚟咁大投資，當地政策配合好重要，好似我哋做湖南菜，一定要搵內地人嚟做至夠地道，我哋有成60個員工，大部份都係內地人，政府外勞政策配合好重要，唔係都好難做，澳門本地難請人。」不過他們開業年多，守了8、9個月，「開咗成年幾，守咗一段時間，慢慢做到啲好客，一張單兩三萬閒閒哋。最近威尼斯人一開，更見效，我哋近威尼斯人，吸引唔少客，佢哋開咗之後，生意即升30%。」「我哋都係買重威尼斯人會吸納到一批高檔客，尤其遲啲佢哋搞會展，我覺得𠵱家只係一個開始。」Sunny哥話畢，兩人都十分客氣，拍了照，轉身又去忙了。
