鄭融
愛蕭亞軒夠靚
「讀書時已經好鍾意聽蕭亞軒（右圖）啲歌，每次唱K都必唱佢嘅歌，永遠畀人一種有外國歌手嘅感覺，不過佢又唔係完全跟風，擁有自己獨特風格，仍然保留國語歌味道。同埋佢個樣好靚，五官輪廓分明，又會有好多表情，好鍾意睇佢個樣，初入行都見過佢，大家都有打招呼。」
採訪、攝影：馬建華、李珮洳、楊潔雯、駱華齡
許志安
最欣賞李聖傑
「台灣藝人當中我近期最欣賞嘅一個係李聖傑（右圖），因為前排我去台灣拍劇時無意中聽到一首歌叫《手放開》，呢首歌真係好好聽，於是我就問人係邊個唱，後來知道係李聖傑唱。我仲特登買佢隻碟聽，發現佢每一隻歌都演繹得好好，所以我好欣賞呢位歌手。」
江若琳
讚曹格有才華
「我最鍾意嘅台灣藝人係曹格（右圖），佢一出道我就鍾意佢，佢好有才華，識得自彈自唱，佢嗰首《世界唯一的你》聽到都冧，所以我都有學佢彈，仲搵佢做目標，係我其中一個學習對象。我希望有一日可以同佢合作，可以自彈自唱。我揀偶像都係會鍾意佢有才華多過個樣靚，因為靚仔冇本心嘛！有才華就唔同，有安全感，樣唔係咁重要。」
曹敏莉
小S反應夠快
「我鍾意小S（徐熙娣，右圖），因為我睇過佢唔少主持嘅節目，覺得佢反應好快，好識得搞氣氛，而且畀人感覺好直好爽，雖然唔係話好靚女，但就好吸引人，同埋個外形好有型格。男仔方面，因為自己唔係特別欣賞靚仔，反而會着重才華多啲，所以我就比較欣賞周杰倫，因為佢啲歌好好聽，最近佢做埋導演，雖然我未睇過，但從外間反應都知佢好畀心機做，所以值得欣賞。」
