元彪雖然年屆50，但他不想認老，更不想變叔父輩，所以從來不肯收徒弟，卻愛與一班年輕人打成一片。年屆36的陳豪，有成熟男人的穩重，也有懂得尊重前輩的禮貌，元彪高度讚揚陳豪，但是一講到收陳豪為徒，元彪即說：「免問！」 撰文：楊潔雯
元彪，武打影星，七小福之一，與成龍和洪金寶是同門師兄弟，當年拍電影，夥拍不少靚女可人兒；陳豪，後起之秀，拍談情說愛戲入木三分，搞笑扮儍一樣了得。兩個演戲經驗豐富的男演員拍戲時，同樣會遇到「男人最怕！」到底是甚麼？原來不是拍全裸戲，是拍咀戲。
「關之琳都咀過」
對於有幾十年演戲經驗的元彪來說，估不到他最怕拍咀戲，他說：「拍動作就難唔到我，但係拍咀戲，真係有難度，雖然係拍過唔少，當年關之琳同出爐港姐，我都咀過，不過始終最怕就係拍呢類嘢，所以今次拍《通天幹探》我同監製講要搵番Maggie（邵美琪）同我做情侶，因為對上一次拍《佛山贊師父》我係同佢合作，習慣咗，都係搵番佢好啲！」
陳豪在無綫「咀女」無數，應該好有經驗，不過原來他一樣最怕拍咀戲，他說：「其實拍咀戲真係唔好受，好多時會搞到好尷尬，我覺得好多劇拍咀戲，係為咗咀而咀，好夾硬，好似人哋外國拍咀戲又唔同feel，自然好多，其實咀戲唔係唔好睇，但係真係要有個mood推動，就好似以前發哥同嘟嘟姐（鄭裕玲）嗰種咀戲，咁咪好睇有feel囉！」
禁拍何B仔特寫
近期《色，戒》最熱，梁朝偉全裸演出，成為全城熱話，假如要元彪全裸的話，他會否答應？他說：「如果搵我拍，導演一定要說服到我點解要全裸，合情合理我唔介意，拍全裸最緊要係劇情需要，好似梁朝偉咁，一個大wideshot，但係你話近鏡影我何B仔，拍到好似四仔，就算你係李安都冇得傾啦！」
電視劇尺度所限，拍裸露鏡頭機會不會太多，不過，陳豪有機會都不怕為藝術犧牲，他說：「其實全裸唔係問題，最緊要係個拍攝手法，好多外國片都有唔少裸露鏡頭，成日都會影到女性胸部，但主要係睇嗰個人用乜角度同眼光去睇，如果遇到部戲，有需要又拍得靚，我都冇所謂。」
亦師亦友
陳豪：有佢指教梗係好
陳豪不經不覺入行13年，入行第一部電影《晚九朝五》，他高大威猛，外形俊朗，可惜星運平平，直至2000年加入無綫，無論是演技、星途都穩步上揚，今年還大有機會問鼎視帝寶座。
新劇演幹探
由陳豪和元彪擔正的台慶劇《通天幹探》，給陳豪一個表現的機會，他飾演一名年輕幹探，身手不凡，對於平日喜歡運動練拳的他，拍動作劇應不會有難度，他說：「今次套劇真係有好多動作，打到飛起，好在有彪哥喺度，好多時佢都會留喺拍攝場地，教我哋點樣做會比較好，大家有商有量，真係學到好多嘢，因為佢拍開電影，今次佢將好多動作電影元素帶入呢個劇度，拍到好似電影咁真實，感覺好新鮮，所以我對呢套劇好有信心。」
讚元彪親切
陳豪跟元彪一拍即合，陳豪拍劇時，感覺對方亦師亦友，十分親切，他說：「彪哥最初畀我感覺好嚴肅，工作態度好認真，我冇諗過佢原來係咁friendly，身手更加唔使講啦！所以我同佢打好大壓力，成日驚達唔到佢要求，佢速度同眼神都好快，我就係怕跟唔到佢個節奏。」
陳豪所言，相信他是需要一位名師指點，擴闊他拍動作片的進步空間，打蛇隨棍上，陳豪是不是想拜元彪為師？他說：「梗係想啦，彪哥拍動作片咁出名，有佢指教，梗係好，求之不得啦！」
陳豪
年紀：36
出身：模特兒出身經發掘參與電影演出，後加入電視。
入行經歷：94年首次參與電影拍攝，在《晚9朝5》中有露股演出，其後在電影中經常扮演歹角，或跟早年喉部長有瘜肉令致聲線沙啞有關。及後經手術治療聲線得以改善，2000年轉戰電視台攀上一線男星地位。
代表作：有《金枝慾孽》、《秀才遇著兵》、《火舞黃沙》及《溏心風暴》等電視作品
拒收徒弟
元彪：好多人鬧兩嘢就走
元彪年少拜倒京劇名師于占元門下，跟師兄洪金寶、成龍、元華等組成「七小福」，自小得師傅地獄式訓練，練得一身好武功，元彪在80年代開始走紅，成為香港電影著名武打紅星之一。
「我唔識教人」
年屆50的元彪現已深居簡出，只會做自己喜歡做的事，拍自己喜歡的戲。據知年中有不少年輕男女想拜元彪為師，卻被他一一拒絕，莫非我行我素的性格，令他打消收徒弟的念頭？
元彪說：「收徒弟，唔可能，絕對唔會，我自問唔識教人，教人係要講興趣，亦要有方式，係一門學問，我自問冇心機教人。時代唔同，我哋以前一唔啱就打，𠵱家行唔通喇！大聲少少都唔得，唔可以吓吓鬧，好多人俾你鬧兩嘢就走，𠵱家要當所有人係朋友，就算係父子、兄弟都一樣，有心機學嘢咪大家研究吓，開心咪大家傾吓點做囉！好似劉家良咁，跪低斟茶，拜師學藝，唔需要喇，咁樣做反而覺得自己老，我都係年輕人嘛！」
讚陳豪沉實
元彪第一次跟陳豪合作拍劇，一向對人對事要求甚高的元彪竟對陳豪讚不絕口，他覺得陳豪身手不錯，有當年狄龍的影子，他說：「陳豪個人唔錯，工作態度好，人又沉實。」受教又聽話，陳豪應該孺子可教，不過談到收陳豪為徒，元彪即刻耍手擰頭說：「我唔敢，如果佢鍾意大家可以研究，唔好講乜拜師咁嚴重，佢尊重我咪講解畀佢聽囉！」
元彪
年紀：50
出身：原名夏令震，孩童時拜于占元為師學習京劇，為成龍及洪金寶同門師弟。
入行經歷：任學徒時已不時跟師傅踏台板，長大後任龍虎武師。其後夥拍兩位師兄拍攝電影，以其京劇武術根底及靈活身手成為80年代動作巨星，遠至日本亦有其影迷會，受歡迎程度僅次於師兄成龍。
代表作：《敗家仔》、《西藏小子》、《蜀山》及《A計劃》等
