中國會創辦人鄧永鏘（David）平時風花雪月，原來回歸前佢見證中、英、港關鍵歷史時刻。佢噚日喺《信報》個專欄爆料，指15年前佢秘密同一位商人見當時英國首相馬卓安，目的係游說馬卓安去北京，同當時中國總理李鵬傾起赤鱲角機場問題。
「六四」後香港人心不穩，港督衞奕信想興建新機場刺激經濟、恢復市民信心，但中、英都唔敢貿然決定，David話馬卓安對建議猶豫不決，擔心無功而還，而且成為「六四」後首個去北京同李鵬握手嘅西方政治領袖，對佢未必有好處。
David與同行商人拍心口保證一定傾得掂，馬卓安先應承，之後嘅事已經係歷史。David今次唔知可唔可以話係還衞奕信一個公道，至於位商人，就係徐展堂。