睇《羅德丞政海浮沉錄》，知道香港政治在回歸前後，以陰謀論掛帥，羅德丞自命聰明一世，處處勸導中方設置防禦機制，唔好信任英方，卒之搞出一個香港立法會嘅畸形政制，成為一個先天性對抗機制，一事無成。羅德丞嘅設計係防止民主派奪權，延續英國勢力；回歸十年實戰情況顯示，功能組別與直選議員分開投票，互相掣肘之下，民主派與建制派誓不妥協，令到所謂行政主導冇晒方向。
羅德丞似乎聰明，實際上傷害咗香港長期管治。作者高繼標另外講述羅家雀局、豪宴鬧笑話、羅太心眼，黃太梁鳳儀拉關係等等，可供他日有人拍電影之用，如果有年輕吳楚帆、鳳凰女、李香琴、南紅、張活游等人做演員最啱，梁朝偉、梁家輝等做唔出嗰一代人嘅表面風光，暗裏呻苦鬥法嘅氣氛。
星期二行過灣仔天地圖書，心念一動，行落去買多一本《羅德丞》，店員話一早賣清，新貨未到。出版商「博益」如果仲唔快啲發行新版，就係嫌錢腥。高繼標好可能仲收埋唔少材料未寫嘅，香港啲周刊素來願意出錢買料，呢次唔知點解唔快啲派人去多倫多搵作者呢？
講番香港政治，自命叻人（如羅德丞）有好多，真正叻人甚少。譬如劉慧卿，做咗咁多年議員，原來亦係冇乜政治智慧，甚為小家子氣。泛民主派裝模作樣，搞出一個甚麼初選機制，搵陳方安生參加，好嘞，陳太加入玩遊戲，一如所料，以大比數擊敗勞永樂，成為泛民主派別唯一立法會補選候選人，按照西方政治慣例，輸咗嘅就會為咗大原則（爭取普選），放棄小原則（民生政策、個別議題），一齊支持陳太。誰知不然，勞永樂唔講嘞，劉慧卿竟然話陳太雖然勝出，仍然要向這個泛民團體爭取支持。如果係咁，搞甚麼初選豈非係細路哥玩泥沙？即使喺台灣，王金平與馬英九、游錫堃與謝長廷邊會公開抬槓㗎？黃毓民讀書多過民主派所有議員自有識見，幫佢哋上吓堂啦。