李家誠和徐子淇愛女李晞彤的千萬「發實宴」，爺爺李兆基風騷豪足兩晚，但親家、徐子淇父母則連日不見蹤影，原來他倆故意低調，一直從秘道出入。前晚徐爸爸終上台致辭，告誡女兒幸福非必然，要不忘行善積福。
徐子淇、李家誠的千億B女李晞彤（Leanna）一連兩晚在中環四季酒店的「發實宴」前晚終於完成，爺爺「亞洲股神」李兆基夜晚10時30分離開時，相信剛剛飲飽食醉，手上仍拎住牙籤興奮笑住揮手，一臉意猶未盡。
人生無常多行善
李兆基一連兩晚發實宴都非常開心，首晚拉鄭裕彤上台，更催兒子開工造人，公開說：「風水先生話Leanna係金叵羅，家誠今晚就開工喇，努力啲！」李家上下開心，但徐子淇爸爸、媽媽就十分低調，兩晚都行秘道入場，避免搶風頭，之後也留在酒店過夜。前晚，李兆基請了親家、徐子淇爸爸徐傳順上台致辭，徐爸爸上台說：「我個女，一出世我就覺得佢好靚，我同佢講，話：『我會愛你一生一世！』𠵱家子淇有咗自己嘅女，佢對Leanna又係講番呢一句：『我會愛你一生一世！』好開心，子淇𠵱家好幸福，有對佢好好嘅老公，不過人生所有嘢都唔係必然，所以一定要多做善事，積福係好重要，行善就會心安理得。」令台下來賓大受感動。
Leanna頭戴玫瑰
徐媽媽彭雪芳雖然沒有上台，但一直在場內，抱着外孫女Leanna，讓子淇安心應酬來賓。夜晚9時半，子淇抱睡着了的Leanna出場，逗留了45分鐘，Leanna全程沒被賓客吵醒，睡得非常甜。有參加李家誠澳洲婚禮的明嘉福兒子明肇豐說：「佢哋兩夫婦真係好開心，爹哋仲話好愛個女，話要愛個女一世，真係聽到好感動，BB女好靚，仲插咗朵玫瑰花喺頭上。」
採訪：顏英儀、梁錦雯
攝影：陳順楨、陳俊強
