【本報訊】在白田邨遇襲後腦重創13歲中一學生袁德豪，昨早上接受手術清除腦部瘀血後傷勢穩定，但情況仍然危殆。消息稱，活躍白田區黑幫14K及和勝和，兩幫女成員早前因故衝突，導致兩派人馬勢成水火，豪仔周四晚與四名友人行經白田邨時，被兩名和勝和兇徒持水喉通尋仇襲擊，他走避不及受重傷。豪仔父母稱為口奔馳，對兒子在外情況及出事原因一無所知，希望他吉人天相「大步檻過」。
豪仔於澳門出生，小學一年級與姓袁母親移居本港，與父親及現年就讀中三15歲姊姊團聚，一家住荔枝角華荔邨，父為裝修工人，母在酒樓當雜工。
三中學生已獲釋
「豪仔鍾意跑步同打籃球，讀小學時比賽攞過優異獎，升中學後，我知佢放學後間中到邨內球場打波，冇聽佢講成日去白田邨。但佢同啲乜嘢人來往，有冇加入黑社會，有冇得罪人我就唔知啦！」袁母昨整日在醫院陪着愛兒，紅着眼坦言承認對兒子在外生活並不清楚。她又指兒子經常夜歸，但從未惹過麻煩，意料不到兒子會懷疑涉及黑幫恩怨惹禍。
「佢通常夜晚11點鐘返屋企，星期四下午放學後返過屋企，放低書包後又出咗去。佢嗰晚冇返嚟瞓，到星期五下午3點鐘學校通知我佢冇返學，6點幾收到警察通知先知豪仔前一晚出事，立即趕去醫院！」
重案組調查獲悉，白田區內黑幫14K及和勝和，近日因雙方女成員衝突致兩幫人馬交惡，豪仔與14K人馬為伍。警方事後尋獲未有受傷同行少年了解，前晚在白田邨搜捕和勝和人馬，帶走三名中學生（14至17歲），調查後相信與案無關釋放，正追緝兇徒下落。