從事攝影工作30年的攝影家葉青霖前晚在灣仔三聯書店舉行「把握當下．葉青霖三十年」講座，跟一眾攝影迷分享有關攝影的心路歷程，並展出部份女藝人的照片，當中包括鍾楚紅、葉童、王祖賢和邱淑貞等。
提到王祖賢的照片時，葉青霖說：「當時王祖賢係幫香港《花花公子》拍，由佢哋畀錢去泰國影，點知王祖賢將件浴袍用釦針扣住，我問佢：『知唔知幫《花花公子》拍？』佢答：『知呀，所以先咁密實。』當時我都好無奈，覺得有關方面冇同佢講清楚，所以自己惟有盡量影得佢性感啲，之後香港《花花公子》嘅出品人鄭經翰（大班）指我拍得唔夠性感，佢哋去同陳自強周旋，最後話要再拍，不過我問大班王祖賢係咪自願，佢話：『當然唔願意啦。』最後我都冇影，因為唔想喺對方唔願意下影。」
影紅姑停唔到手
除此之外，葉青霖大讚鍾楚紅上鏡，他說：「我第一眼見佢覺得佢男仔頭，點知一影覺得佢好靚，影到停唔到手，啲衫都影晒，我就將自己套西裝畀佢着，我細粒，點知佢着咗都好靚，佢好上鏡。」他又謂戚美珍跟苗僑偉和黃日華拍照時，仍未跟阿苗拍拖，他笑說：「但佢就將隻手放喺苗僑偉大髀，就已經睇到當時佢揀咗邊個啦。」
採訪、攝影：李珮洳
