呢排啲季候風真係好強橫，嗰頭喺石澳搞到有小海嘯之餘，跟住又吹到呢度冧樹嗰度冧招牌，搞到好似日日打緊8號風球咁，真係誇張到呢……
咦，原來呢排香港車壇都好多風吹嚟吹去喎！首先有喺灣仔做根據地嘅水貨商「人頭馬車行」，最近入咗兩部好特別嘅新車，佢哋分別係日產MicraC+C開篷小車，同埋Chrysler300CWagon旅行車，前者就大玩的骰Cute嘅Style，啱晒潮人同後生女揸，用嘅亦係慳油到暈嘅1.6公升引擎，配埋電摺硬頂就真係Perfect。後者就啱晒HipHop友，話晒都係大大部美國Wagon，唔只櫳大，後排仲有埋獨立DVD機連LCD屏幕，用嚟睇碟真係一流。之不過咁，兩部車嘅價錢仲有待確定，想睇車嘅你不如打電話去28776700問吓。
至於另一單News，就係話Suzuki同Peugeot喺下星期一（10月8日）搬Showroom，而且仲要係搬離進駐咗多年嘅灣仔告士打道㖭！至於新Showroom喺邊？咪係森那美汽車集團大本營之一嘅環宇汽車大廈囉！據聞呢個設喺荃灣環宇汽車大廈1/F嘅新Showroom，面積比舊嗰個大一截，可以擺晒全線車系，Fans們仲可以有更多空間睇車㖭。所以大家第日去睇車嗰陣，記住唔好去錯地方啦！
記者、攝影：車報員