有啲事，今日唔做，聽日你好可能會後悔。噚日有位讀者羅先生打電話嚟搵八方，查詢今日撐2012普選活動詳情，八方話佢知，今日下晝1點，維園足球場集合，之後有遊行，提醒佢行埋去政府總部。收線前八方多口問佢，「你會去撐普選呀？」羅生好老實：「考慮緊。」一言驚醒，原來仲有好多人心大心細未決定撐唔撐，與其左諗右諗，八方畀十個理由你企出嚟撐。
1〉既然打算參加遊行，何不早啲到撐一撐？
2〉擔住大會提供把遮，遊行時太陽曬可以遮一遮，萬一唔好天可以擋雨。
3〉葉劉星期日會周圍拉票，唔想行街時撞正佢掃興，最好去維園，因為佢講到明唔會喺嗰處蒲頭。
4〉個個星期日都係行街、食飯，之前又睇咗《色，戒》，今日參加另類節目，有啲新鮮感冇咁悶。
5〉朋友都去晒維園撐，你唔去盞冇人陪你玩，不如到場一齊撐啦。
6〉呢個活動有機會創造世界紀錄，聽日返工、返學可以同人講自己係世界紀錄保持者，攞埋大會頒發嘅證書出嚟，證明你冇吹水。
7〉平時星期日你都會帶囝囝、囡囡去維園玩，今日咁多人陪佢一齊玩，呢種集體親子教育活動好罕有，點都要參加。
8〉你做咗咁耐香港人都冇得投票選特首，仲唔出嚟撐，唔通你想仔女都好似你咁慘？
9〉早幾個月7.1遊行後好少運動，為免脂肪積聚身材走樣，都係時候企出嚟，撐一撐，行一行。
10〉唔出嚟撐，你係咪葉劉同曾憲梓啲friend先？