聽鄭海泉演講嘅學生，噚日坐滿成個演講廳，問答時班學生仲越聽越精神，踴躍發問，本來6點結束嘅座談會，遲咗半個鐘先完。鄭大班兩次打斷主持提問，話應該畀學生自己問，𠱁到班學生拍晒手掌。
鄭海泉嘅回答直接又夠寸，啱晒年輕人嘴形，好似講到人才培訓，佢話：「以前讀統計學讀到儍，但出到嚟做嘢，連百分之一都用唔到，點解大學唔搞多啲實用性科目。」
有學生擔心大學資格喺社會未被承認，佢話就：「請人會唔會首選港大同中大生？肯定會啦。唔公平？世界係唔公平㗎喎，所以學生要爭氣。」佢仲向在場嘅樹仁校監胡鴻烈獻計，「樹仁要做推廣。有麝自然香？假嘅，你係神仙，唔講都冇人知啦，一定要推廣。」
一個工商管理系一年級嘅黃同學話：「鄭海泉冇想像中咁嚴肅，而且佢好有深度。」另一位曾同學亦覺得大學生炒股同欠卡數呢個風氣唔好，仲話鄭海泉呢兩個題目講得好好。