無綫今年成立40周年，好似聽人話，以往嘅台慶亮燈儀式，一般安排喺10月中先舉行，但今年嘅亮燈儀式就喺噚日舉行，可能因為咁，有傳媒誤以為電視廣播（511）主席邵六叔噚日生日，同佢「提早」賀壽。
《蘋果日報》娛樂版噚日登咗六叔張身份證，原來佢下個禮拜日先大壽。不過，禮多人不怪，有心日日都可以幫老人家慶祝生日。
作為全宇宙年紀最大嘅上市公司主席，六叔要錢有錢、要女有女，要送份啱心水嘅禮物畀佢，都咪話唔傷腦筋。
不過，華華噚日見到野村份報告，將TVB嘅投資評級調高至「強烈買入」，原因係估2008年開始嘅高清廣播可以食正奧運條水。
對六叔嚟講，份報告應該係最啱聽嘅生日禮物。
生日傳賣盤
雖則有呢支強心針，但撞啱呢幾日個市咁波動，真係講乜都冇用，噚日TVB收市價47.2銀，跌咗2.28巴仙！
一直有傳聞話，六叔百歲壽辰之日，就係TVB賣盤之時，賣盤嘅嘢起碼都要搞一兩個月，所以快嘅話今年內都應該搞得掂喎。至於傳聞真定假，下個禮拜咪有答案囉！