香港嘅銀行經常撈過界，近年除咗大搞證券之外，又想做埋保險公司嗰瓣。無他嘅，皆因按揭貸款業務萎縮，息差低到冇咩肉食，咪焗住要大搞所謂嘅非利息收入囉。
華華收到風，上海商業銀行想喺市場搞收購合併，收購對象係佢哋已經有部份股權既「寶豐保險」。
呢家保險公司，𠵱家係上商同蘇黎世保險嘅合資公司，之不過喺近期，上商反而將啲生意轉介咗畀同業「亞洲保險」。點解「手指會拗出唔拗入」呢？
意見不合自己搞
傳聞話上商同蘇黎世嘅合作關係麻麻哋，雙方有啲意見不合，於是上商將啲業務轉介咗畀外人，搞到寶豐啲生意靜哂，真係「鷸蚌相爭，漁人得利」。
聽講，上商𠵱家同蘇黎世傾緊「分手費」，由上商買番蘇黎世喺寶豐嘅持股，聽講好快會有宣佈。
另外，華華又聽聞蘇黎世喺寶豐保險嘅股份，當年係從太古手上買入嚟嘅；蘇黎世除咗同上商搞合資保險公司之外，亦同永亨銀行搞咗「永亨蘇黎世」。