噚日，孫柏文走去自己嘅blog度，睇吓啲fan屎嘅留言。一睇，就見到（又一個）匿名人士留言，佢話：「一注獨贏沽滙豐，輸到阿媽褲穿窿！」今日，我唔直接去答你，用例子答你。
如果大家睇番股市6月至8月大奇迹日嘅走勢，就會發現股市一路升到7月。不過升市同時，有隻藍籌股一路都唔郁，到7月尾，個市總體已經開始缺乏上升動力，呢隻股票就突然大升。之後個市就開始跌，直至大奇迹日。
至愛去恨佢
咁樣嘅股票就叫「藍燈籠」。以上，6月至8月嗰隻「藍燈籠」，就係恒生（011）。呢幾日，個市跌咗一千點。不過，有隻唔係點郁嘅藍籌突然大升，就係我嘅至愛（至愛去恨佢），滙豐（005）。
大家應該知，我喺滙豐140.6元時，曾經叫過大家「一注獨沽賣滙豐」。所以，有如鬼佬話齋：「IfIdislikeitat$140.6，Ihateitat$150。」Istandbymycall。當然，有啲我好尊敬嘅前輩，話滙豐抵買。理由係市盈率得12.19倍，派息回報有4.55厘。如果你係因呢個邏輯想買滙豐，就不如去花旗國買一樣被次按困擾嘅WashingtonMutual。佢嘅市盈率得10.2，回報更有6.24。不過事先警告，買咗中招，唔好怪我。
中投大手掃？
如果大家問：「不過呢幾日滙豐真係好勁喎！」噚日，曾淵滄教授猜測，啱啱國慶前夕成立，中國政府嘅投資公司大手掃高滙豐（孫柏文加多句，有咁嘅猜測，應該因為如果只得一個腦細胞嘅理性股民，都唔會現在買滙豐）。
所以，除非曾教授嘅猜測係啱，滙豐升，我只可以話，大藍燈籠高高掛。
金手指網誌：
http://phatdat.blogspot.com